Արմեն Ռուստամյանն ԱԺ-ում բարձրացրեց Փանիկ գյուղի ջրի խնդիրը

Այսօր ԱԺ-ում կառավարության հետ հարցուպատասխանի ժամանակ ՀՅԴ խմբակցության ղեկավար Արմեն Ռուստամյանը հարց ուղղեց կառավարությանը, որը վերաբերում էր Շիրակի մարզի Փանիկ գյուղի ոռոգման ջրի խնդրին:

«Մենք վերջերս Շիրակի մարզում էինք: Թե\' գյուղապետը, թե\' ավագանու 10 անդամները ներկայացրել են այդ գյուղում տիրող ծանր վիճակը, որովհետև գյուղում իսպառ բացակայում է ոռոգման ջուրը: Բազմիցս այդ հարցը քննարկվել է, ու բազմաթիվ խոստումներ են տրվել: Բնակչությունն իսկապես այդ խոստումներից հոգնել է, որովհետև որևէ առաջընթաց, որևէ լուծում չի երևում: Ոռոգման ջուր չլինելու պատճառով այգիները, որոնք բարեբեր են եղել, հիմա չորանում են, բանջարանոցները չորանում են: Գյուղապետարանն այդ խնդրի լուծումը տեսնում է փակ խողովակ կառուցելու մեջ, որովհետև ջրի պատճառով անընդհատ վեճեր են ծագում հարևան գյուղերի հետ: Գյուղացիները հուսահատ վիճակում են, ինչ-որ լուծում պետք է տրվի, որպեսզի գյուղացիների դժգոհությունը չվերածվի անհնազանդության, որովհետև նման խնդիր են առաջ քաշում փանիկցիները: Ի՞նչ ծրագրեր կան` այս խնդրի լուծման հետ կապված, և ի՞նչ ժամկետում է այդ հարցը լուծվելու»,- հարցրեց Արմեն Ռուստամյանը:

Գյուղատնտեսության նախարար Սերգո Կարապետյանը առաջարկեց, որ պատգամավորը հարցը գրավոր ուղղի նախարարությանը,  կփորձեն լուծում տալ: