Այսուհետ թանգարանային գույքի ոչ պատշաճ պահպանման համար` ընդհուպ մինչեւ քրեական պատասխանատվություն

Հոկտեմբերի 23-ին արտագնա խորհրդարանական լսումներ կլինեն թանգարաններից որեւէ մեկում, հավանաբար`Կոմիտասի նորաբաց թանգարանում: Լսումների թեման է «Թանգարանների եւ Հայաստանի Հանրապետության թանգարանային ֆոնդի մասին»` կառավարության ներկայացրած նախագիծը: Այն նախատեսում է ընդհուպ մինչեւ քրեական պատասխանատվություն թանգարանների, թանգարանային գույքի ոչ պատշաճ պահպանման համար: Հարցն այսօր քննարկվում էր ԱԺ գիտության, կրթության, մշակույթի, երիտասարդության եւ սպորտի հանձնաժողովում:

«Սա այն օրենքներից է, որ անպայման պիտի խորհրդարանական լսումներ անցնի`մինչեւ ԱԺ լիագումար նիստերի դահլիճ հասնելը»,- իր կարծիքը հայտնեց հանձնաժողովի ՀՀԿ-ական նախագահ Արտակ Դավթյանը:

Հանձնաժողովի անդամները, ինչպես նաեւ կառավարության ներկայացուցիչ, փոխնախարար Արեգ Սամուելյանը, համաձայնեցին նրա հետ: