Հալեպում դարձյալ ռմբակոծություններ են եղել. կան զոհեր և վիրավորներ

ԻՇԻՊ-ի զինյալները ռմբակոծել են Հալեպի Մոկամբո շրջանը, որի հետևանքով եղել են զոհեր, վիրավորներ, ինչպես նաև նյութական մեծ վնասներ. տեղեկացնում է «Գանձասար»-ը:

Օգոստոսի 29-ին Նոր Գյուղի շրջանի բանջարեղենի շուկայի մոտ ընկել է հրթիռ, որի հետևանքով փլուզվել է շենք, սակայն, բարեբախտաբար, զոհեր չեն եղել: Հրթիռներ են ընկել նաև Թիլել և Ճելե շրջաններում:

Կենցաղային առումով` ջուրը հասանելի է քաղաքի համարյա բոլոր շրջաններում: Էլեկտրականությունը երկու օրվա ընթացքում միացվել է ընդամենը մեկուկես ժամով, իսկ համացանցային ծառայությունը մնում է խափանված:

Կայքը տեղեկացնում է, որ նահանգային խորհուրդն սկսել է վառելանյութի հայթայթման աշխատանքները՝ նախքան ձմեռը բնակարանները վառելիքով ապահովելու համար, սակայն վերջին օրերին զգալիորեն բարձրացել է վառելիքի գինը՝ նահանգին հատկացված վառելանյութի քանակի համեմատաբար նվազեցման պատճառով: