Մենք առաջինը կլինենք, որ մեղավորների նկատմամբ օրենքի խստություն կկիրառենք. Արմեն Մուրադյան

 Կառավարության այսօրվա նիստից հետո ՀՀ առողջապահության նախարար Արմեն Մուրադյանը լրագրողների հետ զրույցում նշեց, որ ծննդկանների մահվան վերջին երկու դեպքերը պետք է քննարկվեն իրավապահ մարմինների կողմից: Նախարարը, անդրադառնալով ծննդկաններ Մերի Մարգարյանի և Ջուլիետա Գասպարյանի մահվան դեպքերին, ասաց. «Ստեղծված հանձնաժողովներն աշխատելու են մի քանի ուղղություններով: Հիմնական սկզբունքը լինելու է անաչառությունը, արհեստավարժությունը և հետևողականությունը»:Մուրադյանն ասաց, որ ինքն անձամբ հանդիպել է միայն Մերի Մարգարյանի հարազատներին: Դիտարկմանը, թե մարզային բուժհաստատությունների նկատմամբ դժգոհությունները դեռևս շատ են և մարդիկ բուժման համար շարունակում են մայրաքաղաք այցելել, Մուրադյանը պատասխանեց. «Ամբողջ հանրապետությունով մեկ ծրագրեր են իրականացվում: Մենք իրականացնում ենք ընդհանուր քաղաքականություն` ինչպիսին պետք է լինի»: Նախարարն ընդգծեց նաև, որ վերջին օրերին ծննդկանների մահվան դեպքերի ֆոնին բժիշկների հանդեպ բացասական վերաբերմունք է առաջացել: «Երկրում տարեկան գրանցվում է 53 հազար հղիություն, որից 43 հազարը ծննդաբերությամբ է ավարտվում, 7 հազարն աբորտներն են, իսկ մնացածն ինքաբերաբար հղիության ընդհատումներն են: Տարեկան 18 հազար հղիության պաթոլոգիա է գրանցվում Հայաստանում, որոնցից 1-2 տոկոսը կյանքին ուղիղ սպառնացող վտանգներն են: Այդ բոլոր դեպքերի լուծումն ուղղված է նրան, որ մայրական մահացության դեպքերը նվազեն և փաստացի թվերը վկայում են հենց նվազման մասին»,- ասաց Մուրադյանը` հավելելով. «Յուրաքանչյուր այդպիսի դեպք բոլորիս համար ողբերգություն է: Մենք չենք դիտարկում սա որպես վիճակագրություն, և մենք ամբողջ համակարգի աշխատանքը չենք կարող դիտարկել այդ մի քանի դեպքերի հետ կապված: Եթե այս դեպքերի վերաբերյալ կլինեն խնդիրներ, կարծում եմ` իրավապահները կներկայացնեն դատարան և մենք առաջինը կլինենք, որ օրենքի խստություն կկիրառենք»: