Մեր առաքելությունը վատ հետեւանքներ թույլ չտալն էր. Աղվան Վարդանյան

ԱԺ ՀՅԴ խմբակցության քարտուղար Աղվան Վարդանյանը Yerkir.am-ի հետ զրույցում, խոսելով Բաղրամյան փողոցում արդեն 3-րդ օրը շարունակվող բողոքի ցույցի մասին, նշեց.

«Առաջին օրվա իրադարձությունները նկատի ունենալով` երեկ մի խումբ պատգամավորների, մտավորականության ու շոու բիզնեսի ներկայացուցիչների նախաձեռնությամբ որոշվեց լինել Բաղրամյան պողոտայում և, իբրև կենդանի պատ, կանգնել ցուցարարների և ոստիկանների միջև` փորձելով կանխել հնարավոր առճակատումը:

Գիշերը ժամը 1-ից մինչև առավոտյան 10-ը այնտեղ ենք եղել: Փառք Աստծո, երկու կողմից որևէ սադրանք կամ այլ տիպի գործողություններ չեն եղել` հանդես բերելով զսպվածություն: Առավոտյան, երբ ամեն ինչ շատ ավելի հանդարտ էր, և ցուցարարների թիվը զգալիորեն նվազել էր, ակնհայտ էր, որ արդեն սպառնալիք չկար, դրանից հետո մենք գնացինք Բաղրամյան պողոտայից:

Չեմ կարծում, որ արդեն ամփոփելու ժամանակն է, բայց ակնհայտ է, որ կա երիտասարդ, գիտակից, իրենց իրավունքների, իրենց երկրի տեր զգացող քաղաքացիների մի բազմություն, որը փորձում է իր իրավունքները իրացնել:

Կարծում եմ, որ երկու կողմերն էլ` և\' ցուցարարները, և\' իշխանությունը, կկարողանան գտնել միջանկյալ լուծում, որով կկարողանան ելք գտնել իրավիճակից: Ակնհայտ է, որ առճակատումը, բախումը կամ բռնությունները ձեռնտու չեն առաջին հերթին մեր երկրին ու պետականությանը»:

Հարցին, թե ինչպիսի՞ն, իր կարծիքով, այդ միջանկյալ լուծումը, Աղվան Վարդանյանը պատասխանեց. «Ես հիմա չէի փորձի երկու կողմերի դերակատարության մեջ մտնել, որովհետև մեր երեկվա առաքելությունը ոչ թե որևէ կողմ ներկայացնելն էր, այլ վատ հետևանքներ թույլ չտալը»: