Այնպես չլինի, որ քաղաքի կենտրոնում զբոսաշրջիկների դիմաց կով կամ ցուլ դուրս գա. Արծվիկ Մինասյան

Աժ արտահերթ նիստում քննարկվում է կառավարության կողմից ներկայացված` Տավուշի մարզի Դիլիջան քաղաքային համայնքի և հարակից տարածքների զարգացման ու ներդրումների խրախուսման մասին նախագիծը:

ԱԺ ՀՅԴ խմբակցության պատգամավոր Արծվիկ Մինասյանը նշեց, որ քննարկվող նախագիծը կարևոր է, ոչ միայն այն պատճառով, որ ներկայացնում է մի ամբողջ տարածքի զարգացման ու ներդրումների ծրագիրը, այլ որ ԱԺ-ն անմիջականորեն ներգրավվում է տարածքների զարգացման ծրագրերին: Պատգամավորը կարևորեց պատգամավորների կողմից հետագայում մշտադիտարկում անցկացնելու հարցը: Նա առաջարկեց կառավարությանը, որ ամեն տարի բյուջեի մասին քննարկումների ժամանակ կից ներկայացվեն նաև այդ օրենքի կիրառման ցուցանիշները, ինչն օգտակար կլինի հետագա զարգացումների տեսանկյունից ևս, ուստի կարևոր է, որ ԱԺ-ն օրինական կարգով ստանա այդ տեղեկությունները: Պատգամավորը փորձեց փարատել այն մտահոգությունները, որոնց մասին բարձրաձայնել էին պատգամավորները:

Գործունեության սահմանափակումների մասով հստակ ամրագրված է, որ անասնաբուծությամբ, բուսաբուծությամբ զբաղվելն արգելվում է Դիլիջանի գոտիավորման նախագծերով առանձնացած տարածքներում: «Օրինակ կենտրոնի մասում, երբ տուրիստներ են գալիս, ու դիմացից կովերը կամ ցուլերը դուրս գան, դա վստահաբար էքստրեմալ տուրիզմ չէ, այդ տեսակետից նման սահմանափակումները կարևոր են: Ինքս անցել եմ այդ տարածքներով, տեսել եմ, որ անասունները արածում են փողոցներում: Կարևոր է, որ այդ սահմանափակումը ճիշտ ներկայացվի ու ընկալվի»,- ասաց պատգամավորը: Հաջորդ հարցը, որին անդրադարձավ պատգամավորը, խորհրդի հարցն էր, որը ստեղծվում է քաղաքաշինական  ներդրումների խրախուսման համար: Այն պետք է ունենա լիզորություններ ու ամրագրվի պատասխանատվությունը:

Ըստ Արծվիկ Մինասյանի, այդ խորհուրդը չպետք է միջամտի ՏԻՄ գործունեությանը, որը ամրագրված է Սահմանադրությամբ և օրենքներով: Մյուս կարևոր հարցը վերաբերում էր հարկային արտոնությունների վերաբերյալ ձևակերպումներին: Նա առաջարկեց հարկային մարմինների հետ քննարկել այդ ձևակերպումները: Պատգամավորը նշեց, որ նախագիծը ուղղված է տարածքների զարգացմանը, որ պետք է տալ այդ հնարավորությունը,օրենքով երաշխավորել ներդրողների իրավունքները, բայց նաև լավ կլինի, ըստ պատգամավորի, որ հետագայում այն հիմք դառա Հայաստանի այլ տարածքների զարգացման, մասնավորապես՝ Գյումրիի համար: