Էդվարդ Նալբանդյանն Իրանի փոխարտգործնախարարի հետ քննարկել է տրանսպորտային և էներգետիկ նախագծերի հետ կապված հարցերը

Հայաստանի արտաքին գործերի նախարար Էդվարդ Նալբանդյանն այսօր ընդունել է Իրանի արտգործնախարարի տեղակալ Էբրահիմ Ռահիմ Փուրին, ով Երևան է ժամանել միջգերատեսչական խորհրդատվություններին մասնակցելու նպատակով:

Այս մասին տեղեկացնում է ՀՀ արտաքին գործերի նախարարության մամուլի, տեղեկատվության և հասարակայնության հետ կապերի վարչությունը։

Ողջունելով հյուրին՝ նախարար Նալբանդյանը նշել է, որ Հայաստանը և Իրանը կապված են ավանդական ջերմ, փոխշահավետ հարաբերություններով, որոնց վկայությունն է միջպետական բարձր մակարդակի երկխոսությունը, տարբեր բնագավառներում ակտիվ փոխգործակցությունը:

Շնորհակալություն հայտնելով ընդունելության համար՝ փոխարտգործնախարար Ռահիմ Փուրը Էդվարդ Նալբանդյանին է փոխանցել Իրանի ԱԳ նախարար Մոհամադ Ջավադ Զարիֆի բարեմաղթանքները։ Էբրահիմ Ռահիմ Փուրն ընդգծել է, որ Իրանը կարևորում է հարևան Հայաստանի հետ բարեկամական հարաբերությունների ամրապնդումը և համագործակցության ընդլայնումը:

Զրուցակիցներն անդրադարձել են երկկողմ օրակարգի բազմաթիվ հարցերի, կարևորել են միջխորհրդարանական ձևաչափով փոխգործակցությունը, քննարկել են հայ-իրանական առևտրատնտեսական համագործակցության զարգացման նպատակով ձեռնարկվող քայլերը:

Այս համատեքստում արծարծվել է համատեղ տրանսպորտային և էներգետիկ նախագծերի իրականացումը:

Զրուցակիցները մտքեր են փոխանակել մի շարք հրատապ միջազգային և տարածաշրջանային խնդիրների շուրջ։

Փոխնախարար Ռահիմ Փուրը Հայաստանի արտգործնախարարին է ներկայացրել Իրանի միջուկային ծրագրի շուրջ ընթացող բանակցային գործընթացի վերջին զարգացումները:

Նախարար Նալբանդյանը ներկայացրել է ղարաբաղյան հիմնախնդրի խաղաղ կարգավորման ուղղությամբ ձեռնարկվող ջանքերը։