Վերջին ժամանակահատվածում սահմաններին իրավիճակը հանգիստ է. Սեյրան Օհանյան

Այսօր լրագրողները պաշտպանության նախարար Սեյրան Օհանյանից հետաքրքրվեցին այս գիշեր Բաղանիսի մոտ հակառակորդի կողմից իրականացրած գնդակոծության մասին:

«Սովորական տիպի, ամենօրյա գնդակոծություններ են, որոնք ոչ մի արդյունք չեն ունեցել: Վերջին ժամանակահատվածներում մեր սահմաններին եւ ԼՂՀ-ում իրավիճակը հանգիստ է, վերահսկելի է ՀՀ եւ ԼՂՀ զինված ուժերի կողմից: Այնպես որ` կարող ենք հանդարտ լինել: Այս ամենը մեկ անգամ եւս պարտավորեցնում է, որ հայկական կողմն ավելի հետեւողական կերպով վերահսկի իրավիճակը, հետեւություններ անի, սառնասիրտ որոշումներ կայացնի, եւ պատրաստ լինի ցանկացած զարգացման»,- ասաց նախարարը:

Հիշեցնենք, որ անցած գիշեր հայ-ադրբեջանական սահմանին անհանգիստ է եղել: Հակառակորդը խախտել է հրադադարի պահպանման ռեժիմը Նոյեմբերյանի հատվածում: Կեսգիշերին մոտ կրակել են Տավուշի մարզի Բաղանիս համայնքի ուղղությամբ:

Օհանյանը նշեց, որ հայկական կողմը միշտ էլ արել է այնպես, որ պահպանի հրադադարի ռեժիմը: «Հայ զինվորը խաղաղության զինվոր է, եւ նա ամեն ինչ անում է, որպեսզի ստեղծվի այդ զսպման մեխանիզմը, մեր սահմաններին խաղաղություն տիրի, եւ ամենակարեւորն է` վստահության մակարդակի ստեղծումը, որն ամենաէականն է` բանակցային գործընթացում առաջընթաց ունենալու համար»,- ասաց նախարարը: