Իրավիճակը չի գնահատվում ''լարվածության գագաթնակետ''. Սեյրան Օհանյան

Հայկական զինված ուժերը տեղում տվել են ադրբեջանական սադրանքի պատասխանը. այսօր լրագրողներին ասաց պաշտպանության նախարար Սեյրան Օհանյանը՝ խոսելով վերջին օրերին հայ-ադրբեջանական սահմանին լարվածության մեծացման մասին:

Նա նշեց, որ այսօր իրավիճակը չի գնահատվում որպես «լարվածության գագաթնակետ», որովհետև կրակոցներ միշտ են եղել  որոնց միշտ համարժեք պատասխան է տրվել: «Մենք միշտ եղել ենք պարտադրողի, անհրաժեշտ դեպքում` նաև պատժողի դերում: Նրանց` երեք ու կես անգամ ավելի մեծ հատուկ ստորաբաժանումների գործողությունները կասեցրել է մեր 9 հոգանոց խումբը, որի կազմում էր նաև զոհված հերոս զինվոր Արմեն Հովհաննիսյանը»,- ասաց Սեյրան Օհանյանը:

Նրա խոսքով՝ կրակի տեղափոխումն ավելի խորք, նշանակում է նախապայմաններ ստեղծել ավելի լայն գործողությունների համար, ինչի համար չկան նախադրյալներ: «Եթե լայնամասշտաբ ռազմական գործողությունների ժամանակը գա, մենք դրանք կիրականացնենք: Բայց մարտական գործողությունների սկսման համար տարբեր նախադրյալներ ենք պետք՝ քաղաքական, ռազմական և այլն, ինչը չկա»,- ասաց նախարարը:

Հարցին՝ արդյոք առկա՞ է պատերազմի վերսկսման վտանգ, նախարարը պատասխանեց. «Ռազմական ճանապարհով մենք մեկ անգամ լուծել ենք մեր խնդիրը: Մեզ պարտադրել են պատերազմ, մենք կարողացել ենք մեզ պաշպանել ու լուծել այդ հարցը: Պատերազմի վտանգ միշտ էլ կա, բայց հենց այս պայմաններում պատերազմի սկսման վտանգի հավանականությունը մենք համարում ենք շատ ցածր»: