Այս տարի ավարտական քննություն կհանձնի 25 հազար 12-րդ դասարանցի

Այսօր Երեխաների պաշտպանության օրն է: ԿԳՆ հանրակրթության վարչության պետ Նարինե Հովհաննիսյանը լրագրողների հետ հանդիպման ժամանակ նշեց, որ երեխաներին ցանկանում է, որ նրանք լիարժեք օգտվեն ամենակարևոր` կրթություն ստանալու իրավունքից: Հովհաննիսյանը տեղեկացրեց, որ արդեն մեկնարկել են ավարտական և փոխադրական քննությունները. այսօր 9-րդ դասարանցիները քննություն կհանձնեն հայոց լեզու և գրականություն առարկայից:

«Այս տարի շուրջ 14 հազար 9-րդցի կհանձնի քննություն, ինչպես նաև  12-րդ դասարանի 25 հազար աշակերտ: Այս թվերը վերջին տարիներին չեն փոխվում, նույնն է մնում նաև առաջին դասարան գնացողների թիվը` 37-38 հազար: 9-րդ և 12-րդ դասարանի աշակերտները կհանձնեն քննություն 6 առարկայից»,- հայտնեց Հովհաննիսյանը:

Նա նշեց նաև, որ աշակերտներն ամենից շատ թերանում են «Մաթեմատիկա» առարկայի քննությունից, փոխարենն ավելի հեշտ են հանձնում անգլերենի քննությունը: Ի դեպ, 3 առարկայից անբավարար ստացած աշակերտները հնարավորություն կունենան հուլիս և օգոստոս ամիսներին վերահանձնելու դրանք և փոխադրվելու հաջորդ դասարան: