Պետք է 8000 ուսանողի բարձենք ու տանենք Գյումրի՞. ռեկտորին բարկացրել են ճարտարապետի մտքերը

Ճարտարապետ Գուրգեն Մուշեղյանը հեղինակել է մի նախագիծ, համաձայն որի` Երևանի մի շարք ԲՈւՀ-եր պետք է տեղափոխվեն Գյումրի, իսկ երևանյան այդ բարձրագույն ուսումնական հաստատությունների շենքերը վերածվեն հյուրանոցների:

ՀՀ ԿԳ նախարար Արմեն Աշոտյանը նախօրեին լրագրողների հետ հանդիպման ընթացքում, անդրադառնալով այս նախագծին, նշել է, որ նման նախագիծ չկա, այլ կա Գյումրիին լրացուցիչ ծանրաբեռնվածություն տալու և ԲՈւՀ-երի խոշորացման հարցը:

Ուշագրավ է, որ նույն օրը լրագրողների հետ զրույցում քաղաքաշինության նախարար Նարեկ Սարգսյանն այս թեմայի առնչությամբ ասել է`որոշ ԲՈՒՀ-եր մայրաքաղաքից Գյումրի տեղափոխելը կարող է դառնալ Գյումրու զարգացման ծրագրերից մեկը։ Նախարարը նշել է, որ դա իրենց նախաձեռնությունն է։ «Գյումրի տեղափոխելու հարցը իրականում արդեն 5 տարվա պատմություն ունի։ Ուղղակի երբ դա քննարկվեց նախարարության հարթակում, բոլորի մոտ տպավորություն եղավ, թե նախարարությունը ծրագիր է ուզում անցկացնել: ԲՈՒՀ-երի տեղափոխումը արագ լինող ու հեշտ ծրագիր չէ։ Գյումրին իրավունք ունի ունենալու մայրաքաղաքային ֆունկցիա։ Բոլորս գիտենք, որ ամեն ինչ ամբողջությամբ կենտրոնացնել Երևանում չի կարելի, քանի որ դա խանգարում է այլ քաղաքների զարգացմանը։ Հյուսիս-հարավ ճանապարհի ավարտից հետո ամենաշատը 50 րոպե կտևի Երևան-Գյումրի ճանապարհը»,- ասել է նախարարը:

Yerkir.am-ը զրուցեց Երևանի պետական տնտեսագիտական համալսարանի ռեկտոր Կորյուն Աթոյանի հետ` տեղեկանալու համար, թե այս նախագծի վերաբերյալ ուսանողների և պրոֆեսորադասախոսական կազմի տրամադրվածությունն ինչպիսին է: Ռեկտորը, լսելով մեր հարցը, անմիջապես ասաց, որ այդ մասին խոսելն անգամ անիմաստ է: Նա նշեց, որ եթե սկսի մեկնաբանել այս նախագիծը, ճարտարապետն էլ կարող է լսել, տեսնել ու մտածել, թե խելոք բան է առաջարկել, և մարդիկ իր առաջարկն ակտիվորեն քննարկում են:

Երբ փորձեցինք առաջ քաշել այն հիմնավորումները, որոնք նախագծի հեղինակներն են ներկայացնում, Աթոյանն ասաց. «Ես չեմ հասկանում` ո՞նց են պատկերացնում ուսումնական հաստատությունները Գյումրի տեղափոխելը: Այսինքն` պետք է 8000 ուսանողի բարձենք ու տանենք Գյումրի՞: Դա այս պահին չիրագործվող բան է: Մեկը նման անլուրջ բան է ասել, մենք էլ քննարկե՞նք: Ո՞նց կարելի է սա տանել այնտեղ, մի ուրիշ բան բերել այստեղ: Մարդկային ֆակտր կա, ուսանողներ կան, դասախոսներ կան, հնարավորությունների խնդիր կա: Ո՞նց կարելի է, ասենք, ուսանողին ասել` դու վաղն ավարտելու ես Գյումրիի համալսարանը: Էլի եմ ասում` անլուրջ բանը չի կարելի մեկնաբանել»:

Ռեկտորի կարծիքով` Գյումրիի զարգացումն ապահովելու համար այս տարբերակը գործի դնելը պարզապես չաշխատող է:

«Փոխանակ էնտեղ համալսարան ստեղծեն կամ էնտեղի եղածն ուժեղացնեն, անիմաստ բաներից են կառչում: Կամ էլ թող դանդաղ քայլեր անեն, դանդաղ պրոցեսներ գնան: Բայց դե կրկնում եմ` ԲՈւՀ-ը այդպիսի կառույց չէ, որ բոլորին ասենք` հավաքվեք, վաղվանից գնում ենք Գյումրի ապրելու»,- ընդգծեց Աթոյանը:

Ըստ նրա` Գյումրին տեխնիկապես, շենքային առումով, ինչպես նաև մի շարք գործոններից ելնելով, պատրաստ չէ սրան: «Սկի ստեղ չենք կարողանում նորմալ պայմաններ ստեղծել: Ճարտարապետը գաղափար է ասում` էս բանը տանենք էնդեղ, մի ուրիշ բան բերենք ստեղ, հո դա տենց չի՞: Դա լուրջ չէ: Նախարարը (Աշոտյանը-խմբ.) դրա պատասխանը տվել է»,- ասաց ռեկտորը` հավելելով. «Ես ոչ թե չարացած եմ, այլ գիտակցում եմ, որ նման բան հնարավոր չէ: Տպավորություն կարող է լինել, թե ռեկտորը չի ուզում գնալ Գյումրի, բայց դա չէ այստեղ խնդիրը: Մենք հիմա Գյումրիում մասնաճյուղ ունենք, ի՞նչն է խանգարում, որ Գյումրիի մասնաճյուղում գնան, ընդունվեն: Ազատական ժամանակներ են: Մարդուն չի կարելի ասել` դու գնալու ես` Գյումրիում սովորելու: Էդ մարդը կարող ա ուզում ա Երևանում սովորի: Հիմա ես կարծում եմ, որ նույնիսկ չարժե այդ ամենի մասին խոսել կամ մտածել, թե չէ էդ մարդն էլ կուրախանա, որ նման առաջարկ է արել: Կասի` տեսեք` ինչ խելոք բաներ եմ ասել, քննարկման նյութ է դարձել: Բայց ես միանշանակ կողմ եմ Գյումրիի զարգացմանը: Բայց այս մեթոդով չէ»: 

«Նույն այս կրթական համակարգում կարելի է ավելի արդյունավետ բաներ մտածել: Այնտեղ ծրագիր կա, որ ստեղծվի Շիրակի համալսարան, Լոռու համալսարան` բոլոր մասնագիտություններով: Կարելի է նաև մասնագիտություններն ավելացնել, դանդաղ քայլերով առաջ շարժվել: Կարելի է գործընթաց սկսել, այնտեղի եղածներն ավելի լրջացնել ու ուժեղացնել: Այնտեղի եղած մասնաճյուղերը կարող են միավորվել, խոշորանալ: Իսկ ԲՈւՀ-ը ապրանք չի, որ տեղափոխես»,- եզրափակեց Աթոյանը: