Բաջանաղին դիտողություն է արել կնոջը հայհոյելու համար, հետո՝ ծեծել

Արարատի մարզի դատախազությունը նույն մարզի դատարան է ուղարկել Մասիս քաղաքի բնակիչ, նախկինում դատապարտված Դավիթ Մանվելյանի վերաբերյալ քրեական գործը: Այս մասին տեղեկանում ենք դատական տեղեկատվակա համակարգից:

Ըստ մեղադրանքի՝ Դավիթ Մանվելյանը 2015 թվականի մարտին ընտանիքով հյուրընկալվել է Արտաշատ քաղաքում գտնվող իր աներորդի Ռոման Հայրապետյանի բնակարանում և գտնվելով ալկոհոլի ազդեցության ներքո, քենակալի(բաջանաղին) կողմից սեղանի շուրջ կնոջը հայհոյելու համար նրան դիտողություն կատարելուց հետո, այդ հարցի շուրջ վիճաբանել է նրա հետ, որի ընթացքում բռունցքներով դիտավորությամբ հարվածել է վերջինիս դեմքին:

Արդյունքում ձախ աչքին ու ձախ ակնագնդի 4-րդ աստիճանի կոնտուզիայի, սկլերայի ենթակոնյուկտիվալ պատռվածքի, հիֆեմայի, հեմոֆտալի, ցիլիոխորյոիտալ շերտազատման, կոպերի ենթամաշկային հեմատոմայի և աջ սրունքի քերծվածքի ձևով նրա առողջությանը պատճառել է ծանր մարմնական վնասվածք` օրգանի ֆունկցիայի կորուստի ձևով: Դ. Մանվելյանին մեղադրանք է առաջադրվել ՀՀ ՔՕ 112-րդ հոդվածի հատկանիշներով: Հիշյալ գործը մակագրվել է դատավոր Ռուբիկ Մխիթարյանին: