Սուրիկ Խաչատրյանի «սովորական» մեքենան զրահապատ չէր

Սյունիքի մարզպետ Սուրիկ Խաչատրյանի «Lexus» մակնիշի ավտոմեքենան, որի վրա երեկ կրակոցներ են արձակվել, զրահապատ չէ, նաև ԿԱՍԿՈ տեսակով ապահովագրված չէ: Այս մասին yerkir.am-ին հայտնեց Սուրիկ Խաչատրյանի օգնականը՝ Զարզանդ Նիկողոսյանը:

«Սովորական մեքենա էր, 22-23 փամփուշտ են հանել, 22 տեղից ծակած ա եղել, 5-ը՝ դիմացի ապակու վրա»,- հավելեց նա:

Նշենք, որ ԿԱՍԿՈ ապահովագրատեսակի դեպքում ապահովագրական ընկերությունն է փոխհատուցում մեքենայի վնասը: Իսկ այս դեպքում Սյունիքի մարզպետը ստիպված է լինելու անձամբ վնասը վերականգնել, կամ էլ՝ պետության հաշվին:

Հիշեցնենք որ երեկ` ժամը 18։15-ի սահմաններում, Կապան-Գորիս ավտոճանապարհի 30-րդ կմ հատվածում հրազենային կրակահերթ է արձակվել «Լեքսուս LX 570» մակնիշի ավտոմեքենայի ուղղությամբ, որի մեջ այդ պահին գտնվել է Սյունիքի մարզպետ Սուրիկ Խաչատրյանը։ Նախնական տվյալներով՝ ավտոմեքենայի մեջ եղել է ևս երկու հոգի՝ վարորդը և մարզպետի օգնականը: Տուժածներ չկան։

Դեպքի առթիվ ՀԿԳ քննության գլխավոր վարչության վարույթում հարուցվել է քրեական գործ՝ ՀՀ քրեական օրենսգրքի 34-104-րդ հոդվածի 2-րդ մասի և 235-րդ հոդվածի 1-ին մասի հատկանիշներով։