Ով է թեթև արդյունաբերության հետընթացի մեղավորը

Թեթև արդյունաբերությամբ զբաղվող գործարար Արմեն Հարությունյանը Yerkir.am-ի հետ զրույցում համոզմունք հայտնեց, որ մեր երկրում վերոնշյալ ոլորտի լուրջ բացթողումների և հետընթաց գրանցելու գլխավոր պատճառը դեռևս ավելի վաղ ԵՏՄ-ին չանդամակցելն է: «Մենք միշտ զգացել ենք շուկայի պակաս, իսկ ԵՏՄ-ն անսահմանափակ շուկա է ստեղծում: Այն մեզ թույլ է տալիս զարգացնել մեր արդյունաբերությունը»,- նշեց գործարարը:

Նրա բնորոշմամբ` ԵՏՄ անդամ երկրների հետ բանակցությունները կարող են տևել ամիսներ, տարիներ, սակայն այս պահի դրությամբ ակնհայտ նորամուծություններ են արվում, որոնք միտված են մեր առևտրաշրջանառությունը բարելավելուն: «Դրական արդյունքներ ունենալու համար մենք` գործարարներս, ևս պետք է շատ աշխատենք: Միայն օրենսդիր դաշտի կարգավորումները չէ, որ կարող են եղանակ ստեղծել»,- ասաց Հարությունյանը:

Նրա կարծիքով`մենք վաղուց էինք պատրաստ ԵՏՄ մտնելուն: «ԵՏՄ մտնելու միտքը վաղուց պետք է հղանար, մենք դրան պատրաստ էինք վաղուց: Չունենալով այն շուկան, որը տալիս է ԵՏՄ-ն, մենք լուրջ կորուստներ ենք ունեցել առևտրաարդյունաբերության ոլորտում: Ես իմ մասով կարող եմ ասել նաև, որ թեթև արդյունաբերությունը հետընթաց է ապրել, քանի որ մենք չունեինք այն շուկան, որը ունի ԵՏՄ-ն: Եղած թերություններն էլ ժամանակի ընթացքում կշտկվեն»,- ընդգծեց Հարությունյանը: