ԱԺ պլանկեն լավ իջացրել եք, ես պահանջում եմ նախարարի ներկայություն. Հրանտ Բագրատյան

ԱԺ արտաքին հարաբերությունների մշտական հանձնաժողովի նիստում քննարկվեց Հյուսիս-հարավ ճանապարհային միջանցքի ծրագրի իրականացման ընթացքի վերաբերյալ խորհրդարանական լսումներ կազմակերպելու հարցը:

ԱԺ ՀԱԿ խմբակցության պատգամավոր Հրանտ Բագրատյանը, կողմ արտահայտվելով լսումների կազմակերպմանը, միաժամանակ նշեց, որ ԱԺ-ում պետական գերատեսչության ղեկավարներն առաջին դեմքով չեն ներկայանում:

«Արդեն նախարար չենք տեսնում Ազգային ժողովում: Կարևորագույն նախագծերի քննարկման ժամանակ նախարար չենք տեսնում: Տեսնում ենք նախարարության ներկայացուցիչներին, ովքեր նախարարներից թերի են պատասխանում: Լավագույն դեպքում ասում են` կգնանք, կտեսնենք և ձեր հարցի պատասխանը կասենք»,- ասաց պատգամավորը:

ՀՀԿ-ական Գագիկ Մելիքյանը հակադարձեց` ասելով. «Կարող է` նախարարն ամբողջությամբ չտիրապետի հարցին, բայց փոխնախարարները տիրապետեն»:

«Ուրեմն թող նախարարներն իրենց թիմով ներկայանան Ազգային ժողով: Ազգային ժողովի պլանկեն լավ իջացրել ենք: ԱԺ-ն աշխատում է կառավարության հետ, ես պատգամավոր եմ և պահանջում եմ նախարարի ներկայությունը: Թող գա իր թիմով»,- ասաց Բագրատյանը: