Արծվիկ Մինասյանը աշխատանքի և սոցիալական հարցերի նախարարին առաջարկեց անկեղծ լինել

ԱԺ ՀՅԴ խմբակցության պատգամավոր Արծվիկ Մինասյանն այսօր ԱԺ-ում «Զբաղվածության մասին» օրենքի նախագծի քննարկման ժամանակ հայտարարեց, թե փորձ է արվում համոզել, որ այս օրենքով Հայաստանում լուծվում է զբաղվածության խնդիրը, սակայն դա այդպես չէ:

Նա նշեց, որ ներկայացված նախագծում «կայուն զբաղվածություն» եզրույթը ոչ միայն հեղհեղուկ է, այլև այսօրվա շուկայական պայմաններում ոչինչ չտվող արտահայտություն է: Նա նշեց, որ մեր երկրի կառավարության պարտավորությունը պետք է լինի երկրում լրիվ զբաղվածություն ապահովելը:

Պատգամավորը հիշեցրեց, որ 100 հազար աշխատատեղերի ստեղծման ծրագիր է ներկայացրել կառավարությունը, հետևաբար այս օրինագծով պետք է հստակեցվի` ինչպես է լուծվելու այդ հարցը: Ըստ նրա` այս օրինագծով ոչ թե պետք է փորձեն զբաղվածության նպաստից զրկել գործազուրկներին, այլ դրա լուծման համար պետք է մշակվեն ակտիվ ծրագրեր:

Մինասյանի խոսքով` մարդուն գործազրկության նպաստից կտրելը Եվրոպական սոցիալական խարտիայի խախտում է. «Է, ի՞նչ ենք շահում դրանից: Մենք ձեզ հետ միասին պետք է մտածենք: Արտագաղթը նվազեցնելու համար անհրաժեշտ է մարդկանց աշխատատեղ առաջարկել: Մենք չենք կարող արտագաղթի դեմն առնել, եթե այս վիճակն է շարունակվում: Խոսում ենք դեմոգրաֆիական ճգնաժամի մասին, երեխա ունեցող ընտանիքին պետք է առաջին հերթին զբաղվածության ծրագրերում ներգրավել»,- աասց նա:

ՀՅԴ պատգամավորը առաջարկեց աշխատանքի և սոցիալական հարցերի նախարարին անկեղծ լինել և ԱԺ ամբիոնից հայտարարել՝ «հարգելի քաղաքացիներ, մենք չենք կարող այս նախագծով զբաղվածության ոլորտի հարցերն ամբողջությամբ լուծել»: Պատագամավորի խոսքով` ավելի լավ է կառավարությունը հիմա այդ մասին հայտարարի, քան թե հետո ժողովուրդը հիասթափվի, ու արտագաղթի նոր ալիք բարձրանա: