Ես մարտի դաշտում երբևէ չեմ տեսել Մանվել Գրիգորյանին.Ժորա Ֆարյան

Շուշիի առանձին հրաձգային գումարտակի դասակի հրամանատար Ժորա Ֆարյանն այսօր լրագրողների հետ զրույցում հիշեց Շուշիի ազատագրումը: Նա շեշտեց այն հանգամանքը, որ Շուշիի ազատագրման հարցում իր անուրանալի դերակատարումն ունի Բեկոր Աշոտը:

«Շուշին մեկ օրում չի ազատագրվել: Ես ուզում եմ շեշտել ու բոլորին տեղեկացնել այն, որ Բեկոր Աշոտի չափ ու նման որևէ մեկը չի պայքարել Շուշիում: Շուշիի ազատագրումից հետո ռազամաճակատի գծերի վերածվեց ամեն ինչ: Ստեղծվեցին գնդեր, վաշտեր, դասակներ: Այն բերեց հաղթանակի իներցիա: Սեպտեմբերին արդեն թուրքերը վերջնականապես կանգեցրեցին իրենց ակտիվությունը: Դրան հասանք Շուշիի ազատագրման միջոցով»,- ասաց Ֆարյանը:

Նա նշեց նաև, որ Կոմանդոսի ղեկավարած գործողությունը հաջողությամբ պսակվեց, ու արդեն կեսօրին Շուշին մեր տրամադրության տակ էր:

Անդրադառնալով Ժիրայր Սեֆիլյանի անվան շուրջ պտտվող խոսակցություններին` Ֆարյանը նշեց. «Հիմա ես Ժիրայր Սեֆիլյանի գործողությունները գնահատում եմ նորմալ: Եթե զինվորն ազատագրում է թուրքից, պարտավոր է ժողովրդին էլ տեր կանգնել»:

Հարցին` գուցե արտաքին ուժերի ազդեցության տա՞կ է Ժիրայր Սեֆիլյանը գործում, Ֆարյանը պատասխանեց. «Նա իմ ընկերն է, և ես չեմ կարող գնահատական տալ, դա օբյեկտիվ չի լինի»:

Պատասխանելով Yerkir.am-ի այն հարցին, թե համաձա՞յն է այն տեսակետին, որ Արցախի ազատագրումը սկսվել է Մանվել Գրիգորյանից, նա նշեց, որ մարտի դաշտում երբևէ չի տեսել Մանվել Գրիգորյանին, ապա հավելեց. «Ես որևէ գնահատական չեմ կարող տալ Մանվել Գրիգորյանի ասածներին: Ես Մանվել Գրիգորյանին ճանաչում եմ այնպես, ինչպես Հայաստանի մնացած բնակիչները»: