«Հանրաքվեի մասին» օրենքում փոփոխություններ ու լրացումներ կատարելու մասին օրենքի նախագիծն ընդունվեց

Այսօր կառավարության նիստում ՀՀ արդարադատության նախարար Հովհաննես Մանուկյանը կառավարության քննարկմանը ներկայացրեց կառավարության դիրքորոշումը ԱԺ պատգամավորներ Արծվիկ Մինասյանի, Միքայել Մանուկյանի, Արմեն Ռուստամյանի, Աղվան Վարդանյանի, Արմեն Բաբայանի ու Թևան Պողոսյանի`   «Հանրաքվեի մասին» օրենքում փոփոխություններ ու լրացումներ կատարելու օրենսդրական նախաձեռնության վերաբերյալ:

Նա նշեց, որ նախագծի ընդունման անհրաժեշտությունը պայմանավորվել է այն հանգամանքով, որ 2011թ. մայիսին ընդունված նոր ընտրական օրենսգիրքը պարունակում է էականորեն տարբերվող դրույթներ նախկին օրենսգրքում եղած բազմաթիվ կանոնակարգումներից:

«Խնդիրն ընդամենը համապատասխանեցման մեջ էր, բայց կառավարությունը որոշակի առաջարկություններ ունի, հիմնականում` խմբագրական բնույթի, որոնց վերաբերյալ մենք բանակցել ենք օրենսդրական նախաձեռնության հեղինակների հետ: Ըստ էության` մեր բոլոր առաջարկները ընդունելի են եղել հեղինակների համար, այդ իսկ պատճառով ես առաջարկում եմ դրական եզրակացությամբ ներկայացնել»,- ասաց Հովաննես Մանուկյանը: