Վաղը Սերժ Սարգսյանը կմասնակցի Վաշինգտոնի Մայր տաճարում կայանալիք պատարագին

ՀՀ նախագահի աշխատակազմի ղեկավար, Հայոց ցեղասպանության 100-րդ տարելիցին նվիրված միջոցառումները համակարգող Վիգեն Սարգսյանն այսօր լրագրողներին հայտնեց, որ Ցեղասպանության 100-րդ տարելիցին նվիրված միջոցառումները չեն ավարտվել ապրիլի 24-ով, ավելին` դրանք նոր թափ են ստացել:

Նա նշեց, որ վաղը ՀՀ նախագահը կմասնակցի Վաշինգտոնի Մայր տաճարում կայանալիք պատարագին` երկու երկրների հոգևոր ներկայացուցիչների մասնակցությամբ /հայկական կողմից ներկա կլինեն Գարեգին Բ և Արամ Ա վեհափառները/, որից հետո ԱՄՆ մի շարք քաղաքներում տեղի կունենան տարբեր միջոցառումներ:

«Հունիս ամսին Հայաստանը Կաննում անցկացվող փառատոներից մեկի պատվավոր հյուրն է լինելու, իսկ փառատոնի շրջանակներում մեծարվելու է Կոմիտասն ու նրա գործունեությունը: Հուլիս ամսին էլ տեղի կունենա ցեղասպանագետների միջազգային ընկերակցության 12-րդ համաժողովը, իսկ օգոստոս ամսին Համահայկական խաղերի բացումն է, որին  Թուրքիայի մեծ թվով հայեր են մասնակցում: Սեպտեմբեր ամսին էլ Էջմիածնում մյուռոնօրհնության արարողություն կլինի»,- ասաց Սարգսյանը: