Ադրբեջանի ԱԳՆ-ն արձագանքել է ԼՂՀ-ի ընտրությունների վերաբերյալ ԱՄՆ-ի հայտարարությանը

Ադրբեջանական APA լրատվական գործակալության փոխանցմամբ` Ադրբեջանի ԱԳՆ-ն արձագանքել է ԱՄՆ պետդեպարտամենտի այն հայտարարությանը, որ նա չի ճանաչելու մայիսի 3-ին ԼՂՀ-ում կայանալիք խորհրդարանական ընտրությունների արդյունքները:

karabakhinfo.am-ի փոխանցմամբ` Ադրբեջանի ԱԳՆ-ի մամլո ծառայության ղեկավար Հիքմեթ Գաջիևն ուշադրություն է հրավիրել նրա վրա, որ ԵԱՀԿ Մինսկի խմբում համանախագահող երկրի (ԱՄՆ) արած հայտարարությունում կիրառվել է «Լեռնային Ղարաբաղի ժողովուրդ» արտահայտությունը.«Դա սխալ է և անընդունելի: Ընդհանուր առմամբ, գոյություն չունի «Լեռնային Ղարաբաղի ժողովուրդ» հասկացություն: Ադրբեջանի Հանրապետության Լեռնային Ղարաբաղի տարածաշրջանն ունի իր բնակչությունը, որը բաղկացած է հայ և ադրբեջանական համայնքներից: Տվյալ փաստը պետք է արտահայտվի հստակ»: