Իմ առաջարկը կոնկրետ է` պետք է աշխատենք Հայաստանի հետ. ֆորումի համանախագահող

«Ընդդեմ ցեղասպանություն հանցագործության» գլոբալ ֆորումի համանախագահող Լուիս Մորենո Օկամպոն քննարկման ժամանակ նշեց, որ այսօր էլ աշխարհում կատարվում են երևույթներ, որ կարելի է ցեղասպանություն համարել:

Ցեղասպանությունների դեմ պայքարում կարևոր մարտահրավերը, ըստ նրա, այն է, թե ինչպես պետք է արձագանքել ցեղասպանությանը: «Պետք է կենտրոնանալ այս խնդրի վրա»,- նշեց Օկամպոն՝ հավելելով, որ պետությունը պարտականություններ ունի իր պետության բնակիչների նկատմամբ, իսկ աշխարհն էլ՝ ամբողջ աշխարհի, համայն մարդկության:

«Երբ աշխարհը միասնական է, կարող է ազդել ու զսպել ցեղասպանության ու այլ տարբեր հանցանքների դրսևորումները, բայց ցեղասպանություն իրագործողները գիտեն` ինչպես ազդել այլ պետությունների վրա՝ բիզնեսով, քաղաքական շահերով և այլն: Երբ միջազգային հանրությունը պառակտվում է, դժվարանում այդ պայքարը»,- նշեց նա:

Օկամպոն հարցրեց, թե ինչպես կարելի է գալ քաղաքական կոնսենսուսի Դարֆուրի կամ Սիրիայի իրադարձությունների շուրջ, եթե դեռևս ճանաչված չէ մեկ դար առաջ կատարված Ցեղասպանությունը: «Իմ առաջարկը կոնկրետ է` մենք պետք է աշխատենք Հայաստանի հետ, տեսնենք, թե ինչպես է Հայաստանը հասնում այդ կոնսենսուսին: Պետք է կոնսենսուսի գանք հարյուր տարի առաջ տեղի ունեցածի վերաբերյալ»,- ասաց նա: