Խաղաղապահ ուժերում համանախագահող եւ հարեւան երկրների ներկայացուցիչներ չեն ընդգրկվելու

ԵԱՀԿ Մինսկի խմբի համանախագահներն իրենց հետ նոր գաղափարներ չեն բերել, նրանք շարունակում են աշխատանքը արդեն հայտնի սկզբունքների հիման վրա. համանախագահների հետ հանդիպումից հետո Բաքվում լրագրողներին հայտնել է Ադրբեջանի արտգործնախարար Էլմար Մամեդյարովը:

Նա հավելել է, որ վաղը համանախագահները կմեկնեն Ստեփանակերտ, այնուհետեւ ` Երեւան. տեղեկացնում է 1news.az-ը:

«Մենք հույս ունենք, որ Կազանում կողմերը կկարողանան հաջողության հասնել բանակցային գործընթացում: Սակայն մինչ այդ տեղի կունենա Ադրբեջանի, Հայաստանի եւ Ռուսաստանի արտգործնախարարների հանդիպումը ԵԱՀԿ ՄԽ համանախագահների հետ: Գոյություն ունեն 6 սկզբունքներ, որոնք սահմանվել են Կանադայում «Մեծ ութնյակի» հանդիպման ժամանակ: Եվ դրանց հիման վրա էլ մենք իրականացնում ենք մեր աշխատանքը: Դրանցից առաջինը օկուպացված տարածքների ազատագրում է: Սկզբունքորեն հայերը համաձայն են այս պայմանին, սակայն իրենցն են առաջ քաշում` Լեռնային Ղարաբաղի կամաարտահայտման (հանրաքվեի) անցկացման օրվա նշանակում: Սակայն այդ հարցը Հայաստանի դիրքորոշման հետեւանքով մնում է բաց: Հայերը մշտապես խոսում են դիպուկահարներին շփման գծից դուրս բերելու մասին, սակայն օկուպացված տարածքներից պետք է դուրս բերել ոչ թե դիպուկահարներին, այլ զորքերը»,- ասել է Մամեդյարովը:

Հարցին, թե համաձայնության դեպքում ի՞նչ կազմ կունենան խաղաղապահ ուժերը, նա պատասխանել է, որ պայմանավորվածություն կա, որ դրանց կազմում համանախագահող եւ հարեւան երկրների ներկայացուցիչներ չեն ընդգրկվելու: