9-րդ հարկից ցած նետված տղամարդու մահվան դեպքի առթիվ քր. գործ է հարուցվել` սպանության հատկանիշներով

Արդեն տեղեկացրել ենք, որ Yerkir.am-ին ապրիլի 13-ին Երևանի Դավիթաշեն 3-րդ թաղամասում 64-ամյա տղամարդու մահվան դեպքի վերաբերյալ նոր մանրամասներ են հայտնի դարձել: Մասնավորապես` 9-րդ հարկից ցած նետված տղամարդու դատաբժշկական փորձաքննության արդյունքներով` նրա մարմնի վրա բռնության հետքեր են հայտնաբերել, ինչը վկայում է, որ հնարավոր է կատարվածը ոչ թե ինքնասպանություն, այլ սպանություն է:

Արդեն այսօր Քննչական կոմիտեն հայտարարություն է տարածել, որը ներկայացնում ենք ստորեւ:

9-րդ հարկի բնակարանից ցած նետված քաղաքացու մահվան դեպքի առթիվ Աջափնյակ և Դավթաշեն վարչական շրջանների քննչական բաժնում նախապատրաստված նյութերով հարուցվել է քրեական գործ՝ սպանության հոդվածի հատկանիշներով։

2015 թվականի ապրիլի 13-ին ահազանգ էր ստացվել` ըստ  որի Տ.Պետրոսյան 18շ  բնակիչ, 1951թ. ծնված Ա.Խանզադյանը  9-րդ հարկի իրենց բնակարանի պատշգամբից ցած նետվելու եղանակով ինքնասպան է եղել:

ՀՀ քննչական կոմիտեի Երևանի քննչական վարչության Աջափնյակ և Դավթաշեն վարչական շրջանների քննչական բաժնի վարույթում նյութեր են նախապատրաստվել՝ պարզելու քաղաքացու մահվան հանգամանքները։  Ա.Խանզադյանի դիակի զննությամբ՝ վերջինիս պարանոցի շրջանի զույգ կեսերին հայտնաբերվել են արյունազեղումներ՝ հավասարաչափ ձևով արտահայտված։

ՀՀ առողջապահության նախարարության ԴԲԳԳԿ-ից ստացված գրության համաձայն՝  քաղաքացու մահվան պատճառ են հանդիսացել կյանքի հետ անհամատեղելի մարմնական վնասվածքները՝ գլխի, կրծքավանդակի, որովայնի, ողնաշարի, վերին և ստորին զույգ վերջույթների համակցված,  բաց և փակ բութ վնասվածքները, պարանոցի շրջանի փակ բութ վնասվածք՝ ենթալեզվի ոսկրի և վահանաճառի ոտիկի կոտրվածք։

Նախապատրաստված նյութերով քննչական բաժնում հարուցվել է քրեական գործ՝ ՀՀ քրեական օրենսգրքի 104-րդ հոդվածի հատկանիշներով։

Ձեռնարկվում են անհրաժեշտ քննչական եւ դատավարական միջոցառումներ՝  քաղաքացու մահվան հանգամանքնեպի բազմակողմանի և օբյեկտիվ հետազոտումն ապահովելու ուղղությամբ։