Գրում եք, բայց չեք հետևում. վարչապետը նկատողություն արեց նախարարներին

Կառավարությունն այսօր մերժեց ԱԺ ՀՀԿ խմբակցության պատգամավորներ Վահրամ Բաղդասարյանի, Սամվել Ֆարմանյանի, Խոսրով Հարությունյանի, Էդուարդ Շարմազանովի, Արփինե Հովհաննիսյանի, Մարգարիտ Եսայանի՝ օրենսդրական նախաձեռնության կարգով ներկայացրած «ՀՀ քաղաքացիական դատավարության օրենսգրքում փոփոխություն և լրացում կատարելու մասին» օրենքի նախագիծը:

Արդարադատության նախարար Հովհաննես Մանուկյանը նշեց, որ օրենսգիրքը սահմանում է, որ որևէ քաղաքացու անգործունակ ճանաչելու վերաբերյալ գործը դատարանը քննում է խնամակալության և հոգաբարձության որևէ ներկայացուցչի մասնակցությամբ: Քաղաքացին կարող է կանչվել դատական նիստին, եթե թույլ է տալիս նրա առողջական վիճակը, նույնիսկ այս դեպքում քննելի է դատական նիստին քաղաքացու մասնակցությունը:

Նախագծի հեղինակներն առաջարկում են, բացի խնամակալից, ընտանիքի անդամից կամ հոգեբուժական հաստատության տնօրինությունից, գործունակության վերականգնման վերաբերյալ դատարան դիմելու հնարավորություն տալ քաղաքացուն: Նախարարն ասաց, որ կառավարությունը սկզբունքորեն չի մերժում, որոշակի առաջարկներ ընդունելու դեպքում այս նախագիծն ընդունելի կհամարեն: Օրինակ՝ պետք է հաշվի առնել, թե նիստին այս քաղաքացու մասնակցությունը վտանգավոր կլինի՞ նիստի մյուս մասնակիցների համար, թե՞ ոչ:

Վարչապետ Հովիկ Աբրահամյանը նշեց. «Այս հարցը մի քիչ զգայուն է: Դուք այդպես գրում եք, բայց չեք հետևում: Ընդհանուր եմ ասում բոլոր նախարարություններին, բոլոր նախարարներին, և այնտեղ հաշվի չեն առնում մեր առաջարկները, և հանձնաժողովը դրական եզրակացությամբ որոշում է կայացնում ու ընդգրկում մեծ օրակարգ: Հետամուտ պետք է լինեք, նաև հանդիպեք նախագիծն առաջարկող պատգամավորների հետ: Շատ է եղել` մենք առաջարկները ներկայացրել ենք, հետո գնացել է օրակարգ, իբր կառավարությունը դեմ է: Դրա համար պիտի հետամուտ լինեք, որ ձեր առաջարկներն այնտեղ ընդունվեն: Այդ պարագայում նոր դրական համարվի մեր կարծիքը»: