Իմ ասածը Ձեզ համար ահազանգ չի՞. վարչապետը փոխնախարարին նկատողություն արեց

Այսօր կառավարության նիստում կապի և տրանսպորտի փոխնախարար Արթուր Առաքելյանը ներկայացրեց որոշում, որով նախատեսվում է թույլատրել «Սաֆեժ» ԲԲԸ-ին «Հյուսիս-հարավ» ներդրումային ծրագրի շրջանակներում վերակառուցվող Երևան-Աշտարակ-Թալին ճանապարհահատվածի շինարարական աշխատանքներում «Շինարարության որակի տեխնիկական հսկողություն» գործունեություն իրականացնել: Նշենք, որ «Սաֆեժ» ԲԲԸ-ն օտարերկյա ընկերություն է:

Վարչապետ Հովիկ Աբրահամյանը հարցրեց. «Աշտարակ-Թալին ճանապարհահատվածում ինչու՞ են դանդաղում աշխատանքները, երկու անգամ ձեզ զգուշացրել եմ արդեն, ի՞նչն է պատճառը, կարո՞ղ եմ հասկանալ»:

Արթուր Առաքելյանը նշեց, որ շինարարություն իրականացնող ընկերության ունեցած ժամանակային  գրաֆիկին համապատասխան ընթանում են աշխատանքները, և ահազանգեր չկան այդ կապակցությամբ:

Հովիկ Աբրահամյանը արձագանքեց. «Իսկ իմ ասածը ահազանգ չի՞ ձեզ համար»:Ապա շարունակեց, որ կան  հիմնավոր կամ անհիմն խոսակցություններ ու դժգոհություններ այդ իսպանական շինարարական ընկերության աշխատանքների վերաբերյալ:

«Խոսակցություններ կան, որ ճանապարհը անորակ է, որ իսպանական այդ ընկերության հետ կապված անընդհատ խնդիրներ կան, որ փողերը չկան, փողերը տարել են, ինչ են արել, ուսումնասիրեք, հասկանանք, թե ինչ է կատարվում»,- ասաց Հովիկ Աբրահամյանը` հավելելով, որ այդ խոսակցությունները հենց ընկերության ներսի աշխատակիցների կողմից են տարածվում:Արթուր Առաքելյանը խոստացավ ուսումնասիրել վարչապետի հնչեցրած հարցերը:

Որոշումն ընդունվեց: