Վարչապետը զայրացած է` նկատողություն արեց բոլոր նախարարներին

Այսօր կառավարության նիստում, երբ ՀՀ արդարադատության նախարար Հովհաննես Մանուկյանը կառավարության հաստատմանը ներկայացրեց հերթական որոշումը, նա խնդրեց վարչապետին տալ երեք օր ժամանակ քննարկման համար: Դա զայրացրեց վարչապետին. «Չեմ հասկանում, ամեն հարցի համար ասում եք` երեք օր ժամանակ, երկու օր ժամանակ: Նորմալ աշխատեք, ի՞նչ է պատահել, չեմ հասկանում, ձեր նպատակն ի՞նչ է»:

Հովհաննես Մանուկյանը նշեց, որ աշխատանքային պրոցեսով է դա պայմանավորված:

«Աշխատանքային պրոցես է, ուրեմն` մինչև կառավարության նիստն այդ ամեն ինչը ավարտեք: Մենք այստեղ լսում, պայմանավորվում ենք, որ դուք հետո ինչ-որ բան փոխե՞ք: Չեմ հասկանում` դա ի՞նչ ոճ է: Կառավարության նիստում հաստատվելուց հետո ոչ մի բան չի փոխվելու: Եթե կառավարությունը տալիս է համաձայնություն, ուրեմն բովանդակային ոչ մի բան չպետք է փոխվի»,- ասաց վարչապետը:

Նախարարը պատասխանեց, որ խնդիրը ոչ թե բովանդակային է, այլ տեխնիկական: Վարչապետը նշեց, որ ոչ մի տեխնիկական բնույթի պատճառ չի ընդունում, և այդ նկատողությունը վերաբերում է բոլոր նախարարներին:

«Կարող են լինել հրատապ հարցեր, բայց ինչ ներկայացնում եք, ասում եք՝ տվեք երկու-երեք օր ժամանակ, ավանդույթ եք դարձրել»,- ասաց վարչապետը: