ՀՅԴ-ի պատասխանը` վարչապետին. ՀՅԴ-ն չի ընդգրկվի հակակոռուպցիոն խորհրդի կազմում

ԱԺ ՀՅԴ խմբակցության ղեկավար Արմեն Ռուստամյանը մարտի 31-ին նամակով դիմել է ՀՀ վարչապետ Հովիկ Աբահամյանին՝ ի պատասխան վարչապետի՝ ՀՅԴ-ին արված՝ կոռուպցիայի դեմ պայքարի խորհրդի կազմում ընդգրվելու առաջարկության:

Հիշեցնենք, որ խորհրդարանական խմբակցություններից դեռ միայն ԲՀԿ-ն է պատրաստակամություն հայտնել ներկայացուցիչ ունենալ այդ խորհրդում:

Ստորեւ ներկայացնում ենք նամակը:

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ ՊԱՐՈՆ Հ. ԱԲՐԱՀԱՄՅԱՆԻՆ

Մեծարգո վարչապետ,

Շնորհակալություն հայտնելով Ձեր՝ 20.03.15թ. թիվ 01/41.1/4250-15 գրությամբ արված առաջարկության համար՝ կառավարության 19.02.15թ. թիվ 165-Ն որոշմամբ ստեղծվող կոռուպցիայի դեմ պայքարի խորհրդի կազմում ՀՅԴ խմբակցությունից մեկ ներկայացուցիչ ընդգրկելու վերաբերյալ, այս պահին ձեռնպահ ենք մնում թեկնածու առաջադրելուց:

Գերակա խնդիր համարելով կոռուպցիայի դեմ համակարգային և ամբողջական պայքարը` մենք տարբեր առիթներով ներկայացրել ենք հանրային վստահությունն ապահովող, անկախությունը երաշխավորող հակակոռուպցիոն մարմնի ձևավորման առաջարկություններ, որոնք անտեսվել են:

Այնուամենայնիվ, օգտվելով ՀՀ կառավարության 19.05.14թ. թիվ 511-Ա որոշմամբ հաստատված և ՀՀ ԱԺ կողմից հավանության արժանացած կառավարության ծրագրի այն դրույթից, որի համաձայն` «Հայաստանի Հանրապետության կառավարությունը կապահովի բաց տեղեկատվության լիարժեք հասանելիությունը, կայուն կապի ձևավորումը և շարունակական երկխոսությունը քաղաքացիական հասարակության, իշխանության մարմինների ու հանրային ինստիտուտների միջև», այս փուլում մեզ իրավունք կվերապահենք ներկայացնել կոնկրետ առաջարկություններ և ահազանգեր՝ այդքանով բերելով մեր օժանդակությունը հակակոռուպցիոն պայքարին:

Հարգանքով՝ ԽՄԲԱԿՑՈՒԹՅԱՆ ՂԵԿԱՎԱՐ ԱՐՄԵՆ ՌՈՒՍՏԱՄՅԱՆ

31.03.15