Ինքնասպան եղած տղան ապրում էր տնակում` մոր ու մանկատնից վերադարձած քրոջ հետ

Երեկ հերթական ինքնասպանության դեպքն է գրանցվել, այս անգամ` Տավուշի մարզի Մեծ Պարնի համայնքում: Թոնրատանը կախված վիճակում հայտնաբերվել է նույն գյուղի բնակիչ` 22-ամյա Արսեն Ասատրյանը:

Yerkir.am-ի տեղեկություններով` երիտասարդն ամուսնացած չէր, ապրում էր տնակում` մոր և 21-ամյա քրոջ հետ: Ինքնասպանությունից առաջ որևէ գրություն չի թողել:

Yerkir.am-ի հետ զրույցում Մեծ Պարնիի գյուղապետ Գագիկ Պալյանը հայտնեց, որ ընտանիքը սոցիալապես ծանր վիճակում էր ապրում:

«Հայրը մորից բաժանվել էր ու նոր ընտանիք կազմել այլ վայրում, իսկ հետո` մահացել: Մայրը ստիպված դստերը հանձնել էր մանկատուն, երեք տարի առաջ, երբ աղջիկը չափահաս դարձավ, վերադարձավ տուն»,- պատմեց գյուղապետն ու հավելեց, որ աղջկա մոտ որոշակի հոգեկան շեղումներ են նկատվում:

Գյուղապետը հայտնեց, որ մահացած երիտասարդի մայրը համագյուղացիների մոտ օրավարձով տարբեր աշխատանքներ էր կատարում` կով էր կթում և այլն:

«Օրվա հացի փողով ապրող ընտանիք էր: Տղան էլ մի ժամանակ Երևանում էր աշխատում, ամռանը գյուղացիների խոտերը բերում»,-ասաց նա:

Պալյանի խոսքով` համագյուղացիները երիտասարդի մոտ տարօրինակություններ չեն նկատել, հնարավոր է` կատարվածն ընտանեկան վիճակի արդյունք լինի, չի բացառվում, որ կապված լինի նաև քրոջ հետ:

Նա նշեց, որ Արսենին կհուղարկավորեն վաղը: