Այգեշատում 11-ամյա աղջնակ է ինքնասպան եղել. ըստ վարկածի` կատարվածը պատահականություն է

Այսօր դժբախտ դեպք է տեղի ունեցել Արմավիրի մարզի Այգեշատ համայնքում: Առաստաղից կախվելու միջոցով ինքնասպանություն է գործել 11-ամյա աղջիկ:

Yerkir.am- ի տեղեկություններով` մահացածը սովորում էր գյուղի դպրոցի 6-րդ դասարանում:

Մեզ հետ զրույցում Այգեշատի գյուղապետ  Արամայիս Մխիթարյանը հայտնեց, որ ընտանիքը սոցիալապես վատ պայմաններում էր ապրում: «աղջկն  իրենից մեծ քույր ու եղբայր ուներ, սովորական ապրող ընտանիք էր»,- ասաց նա:

Համայնքապետի խոսքով` դեպքի ժամանակ տանը մարդ չի եղել, ծնողները դաշտում աշխատելիս են եղել:

«Ընդամենը կես ժամ են մենակ թողել, հարևանի տղան եկել է, ձայն տվել, տեսել է` տանը մարդ չկա: Իրենք դրսում խոհանոց ունեն, մոտով անցել է, տեսել` աղջիկը կախված է»,- ասաց նա:

Մխիթարյանի խոսքով` մահացածը կենսուրախ աղջիկ էր և այդ տարիքում դժվար թե ինքնասպանություն գործելու պատճառ ունենար: «Հնարավոր է` հետաքրքրության համար փորձել է, չի գիտակցել, այնպես է, որ պարանն (տուկի թել) անգամ օղ չի արել, ուղղակի երևի դնչին է դրել, աթոռը տակից գնացել է, խեղդվել է»: Ըստ նրա` հարևանի տղան երբ իջեցրել է աղջկան, նա դեռ ողջ է եղել, սակայն մինչ շտապօգնության ժամանելը մահացել է:

Նշենք, որ դեպքի կապակցությամբ քննություն է ընթանում: