Ծառուկյանի բիզնեսի ստուգումներն ընթացքի մեջ են. ֆինանսների փոխնախարար

Այսօր լրագրողները ՀՀ ֆինանսների փոխնախարար Վախթանգ Միրումյանից հետաքրքրվեցին, թե ի՞նչ փուլում են գտնվում Գագիկ Ծառուկյանի բիզնեսների հարկային ստուգումները: «Ուսումնասիրությունները դեռևս ընթացքի մեջ են»,- հնարավորինս կարճ պատասխանեց փոխնախարարը:

Լրագրողները հետաքրքրվեցին` որևէ բան արդեն բացահայտվե՞լ է: «Գիտեք, մեկ-երկու օրում նման հարցերը չեն լուծվում, դա տևական պրոցես է: Ուսումնասիրությունները կարող են տևել մեկից մինչև օրենսդրությամբ սահմանված կարգը»,- ասաց նա:

Իսկ թե որքա՞ն ժամանակ է նախատեսում օրենքով սահմանված կարգը, Միրումյանը պատասխանեց. «Ստուգումների մասին օրենքի համաձայն`  նախատեսված է 15 օր, սակայն, խոշոր տնտեսվարողների հետ կապված, մինչև 75 օր կարելի է ստուգումներ անցկացնել»,- ասաց  փոխնախարարը:

Հարցին, թե մինչ այս Գագիկ Ծառուկյանին պատկանող ընկերություններում անցկացված ստուգումների արդյունքում ինչ-որ լուրջ խախտումներ հայտնաբերվե՞լ են, Միրումյանը դժվարացավ կոնկրետ դեպք նշել` ասելով, թե հարկային մարմինները տարվա մեջ հազարավոր ստուգումներ են ացկացնում, և ինքն այս պահին չի կարող հստակ դեպք նշել: