«Չթողնես երբեք». «Ne me quitte pas»-ի հայերեն տարբերակը` Լիլիթ Բլեյանի կատարմամբ

Երգչուհի-լրագրող Լիլիթ Բլեյանը հայտնի «Ne me quitte pas» երգի հայերեն տարբերակն է ներկայացրել` «Չթողնես երբեք»:

Բլեյանը ֆեյսբուքյան իր էջում գրել է. «Շեղվեք էս օրերի թեմայից մի պահ, եկեք երգ լսենք! Հատկապես եթե ձեր մեջ կան Ժակ Բրելի հայտնի երգի սիրահարներ: Իմ առաջին նման փորձն է` թարգմանել ու կատարել ինձ չպատկանող երգ: Դրա համար էլ թարգմանեցի, որ մի քիչ գոնե իմը դառնա, և շատ ուրախ կլինեմ, եթե նաև ձերը դառնա՝ հայերեն կենդանի այս տարբերակով:

Շնորհակալ եմ իմ սիրելի ու անփոխարինելի գործընկերոջը՝ Տիգրան Տեր Ստեփանյանին, ով ժամանակ գտավ ու գրեթե էքսպրոմտով նվագակցեց ինձ ստուդիայում, Արդինի ստուդիային՝ ձայնագրության, E-motion ստուդիային՝ սիրուն հոլովակի համար, և իհարկե՝ տաղանդավոր նկարիչ Պետո Պողոսյանին, ում նկարները զարդարում են երգն ու անվերջ բարի, քնքուշ տրամադրություն ստեղծում: Ու չնայած ինքը չի սիրում, որ իր մասին գրում եմ, բայց ամենամեծ շնորհակալությունն իհարկե իմ ամուսնուն՝ Վահեին, ով այս տարբերակը դեռ «օրորոցում» այնքան սիրեց, որ չձայնագրել ուղղակի չէի կարող: Չմոռանաք այսօր իրար սիրուն բաներ ասել»: