ԵՏՄ միջկառավարական նիստում Հայաստանի համար դրական պայմանավորվածություններ են ձեռք բերվել. Վարդան Այվազյան

ԱԺ ՀՀԿ խմբակցության պատգամավոր, ԱԺ տնտեսական հարցերի հանձնաժողովի նախագահ Վարդան Այվազյանը նոր է վերադարձել Մոսկվայից, ուր ՀՀ վարչապետ Հովիկ Աբրահամյանի գլխավորած պատվիրակության կազմում մասնակցել է Եվրասիական միջկառավարական խորհրդի առաջին նիստին:

Լրագրողների հարցին, թե ի՞նչ արդյունքներ կան, Վարդան Այվազյանը պատասխանեց. «Շատ դրական տնտեսական ձեռքբերումներ եղան` տարբեր հարցերի հետ կապված, նաև` գազի գնի հետ կապված, սոցիալ-տնտեսական ոլորտին առնչվող»:

Մեր հարցին` Ռուսաստանը մտադիր է ռուբլով հաշվարկել Հայաստանին վաճառված գազի գումարը, նա պատասխանեց. «Բայց ինչո՞ւ պետք է ռուբլով հաշվարկենք, մենք մեր ազգային տարադրամն ունենք»:

Հիշեցնենք, որ դեկտեմբերի վերջին ՀՀ էկոնոմիկայի նախարար Կարեն Ճշմարիտյանը հայտարարել էր, որ Հայաստանն ու Ռուսաստանը չեն կարող գազի գինը հաշվարկել ռուբլով, քանի որ դա ձեռնտու չէ:

«ԵՏՄ-ն ռեալ հնարավորություն է մեր տնտեսության զարգացման համար` արտահանման ծավալների մեծացմանն ուղղված»,- ասաց Վարդան Այվազյանը:

Դիտարկմանը, որ ԵՏՄ-ին անդամակցելուց 10 օր է անցել, սակայն որևէ առաջընթաց չկա, ընդհակառակը` արտահանման ծավալներն են նվազել, նա պատասխանեց, որ Հայաստանը գտնվում է տնտեսական ճգնաժամի մեջ, ռուբլին մեծապես արժեզրկվել է, բացի այդ` հունվար ամիսը միշտ էլ համարվում է պասիվ` ապրանքաշրջանառության տեսակետից, ուստի տրամաբանական է, որ արտահանման ծավալները պետք է նվազեին: ՀՀԿ-ական պատգամավորը հավելեց, որ դեռևս ժամանակ է պահանջվում, որպեսզի Հայաստանի տնտեսությունը կարողանա օգտվել ԵՏՄ մեխանիզմներից: