Ոչինչ, մեկ-մեկ էլ թող ես խախտումներ անեմ. Գալուստ Սահակյան

Այսօր ԱԺ նիստում ընդդիմադիր պատգամավոր Նիկոլ Փաշինյաննը անդրադարձավ երկու օր առաջ Բերձորում տեղի ունեցած միջադեպին, ասաց, որ հանրությունը սպասում է պատասխանների:

Պատգամավորը ԱԺ նախագահին առաջարկեց ստեղծել ԱԺ պատգամավորների ներկայացուցչական պատվիրակություն, որը կմեկնի Ստեփանակերտ, որպեսզի Արցախի իշխնության ներկայցուցիչների հետ քննարկեն Բերձորում տեղի ունեցած միջադեպի բացասական հետևանքները չեզոքացնելու հարցը:

ԱԺ նախագահ Գալուստ Սահակյանը, արձագանքելով Նիկոլ Փաշինյանին, ասաց. «Ես այսօր կփորձեմ քննարկել այդ հարցը ԼՂՀ-ի իմ գործընկերոջ՝ ԱԺ նախագահի հետ: Կարծում եմ` միջադեպի առումով ԼՂ պատկան մարմինները զբաղվում են, կփորձեմ այդ ինֆորմացիան հնարավորինս վերլուծությունների ենթարկել և կարձագանքեմ Ձեր հայտարարությունը»:

ԱԺ ՀԱԿ խմբակցության ղեկավար Լևոն Զուրաբյանն էլ իր վրդովմունքը հայտնեց, որ եռյակի բարձրաձայնած` կառավարական համակարգի ճգնաժամի հարցն օրակարգում ընդգրկված չէ: Պատգամավորը հիշեցրեց, որ ինքն է ԱԺ նախագահին նախորդ անգամ տեղեկացրել, որ պետք չէ այդ հարցը քննարկել, քանի որ այն համընկել է Ադրբեջանի կողմից հայկական ուղղաթիռի խոցման դեպքի հետ:

«Դուք իմաստազրկում եք արտահերթ քննարկման ինստիտուտը, ավելին` Դուք խախտում եք ընդդիմության իրավունքները: Սա նշանակում է, որ Դուք վախենում եք: Այս հարցին ավելի բովանդակալից անդրադառնալու և սպառիչ քննարկելու համար պահանջում ենք քսան րոպե ընդմիջում: Սա սահմանադրական իրավունքի կոպտագույն խախտում է»,- հայտարարեց Զուրաբյանը:

«Պարոն Զուրաբյանը հանգստանալ է ուզում` 20 րոպե ընդմիջում»,- ասաց ԱԺ նախագահը:

Ընդմիջումից հետո ԱԺ նախագահ Գալուստ Սահակյանը շեշտեց, որ, ընդմիջում թույլ տալով, խախտում է թույլ տվել ու ավելացրեց. «Բայց ոչինչ, մեկ-մեկ էլ թող ես խախտումներ անեմ»: