Պերմյակո՞վն է կատարել, թե՞ ինչ-որ ուժեր կան, որ կանգնած են նրա հետևում. Սեյրան Օհանյան

ՀՀ պաշտպանության նախարարի հետ հանդիպման ժամանակ լրագրողները չշրջանցեցին Գյումրու ողբերգությունը: Նրանց հետաքրքրում էր` արդյո՞ք նախարարը բարձրացրել է Պերմյակովին Հայաստանի իրավապահներին փոխանցելու հարցը:

Սեյրան Օհանյանը նշեց, որ ողբերգական իրադարձություն է եղել Գյումրիում, բայց հարցն իրավական դաշտում է: Ըստ նրա` ՌԴ պաշտպանության նախարարը և նրա տեղակալը նույնպես դատապարտել են այդ երևույթը: «Կարծում եմ, որ իրավական աշխատանքները կտան բոլոր պատասխանները»,- ասաց նախարարը:

Հարց հնչեց նաև, թե արդյո՞ք Պերմյակովին բռնելիս ռուսական կողմը չի խախտել հայ-ռուսական միջպետական պայմանագիրը:

«Բերեք` Պերմյակովին և այդ գործով զբաղվող հայ-ռուսական համատեղ խմբին հանգիստ թողնենք, որովհետև բավական լուրջ աշխատանք ունեն կատարելու: Ի վերջո, պետք է իմանան` Պերմյակո՞վն է կատարել, թե՞ ինչ-որ ուժեր կան, որ կանգնած են նրա հետևում: Շատ-շատ խնդիրներ կան, որոնք իրենց մեջ գաղտնիություն են պարունակում: Ո'չ ես, ո'չ էլ դուք իրավունք չունենք մտնելու այդ մասնագիտական մանրուքների մեջ, որոնցով զբաղվում են իրավապահ մարմինները»,- ասաց նախարարը:

Նա նաև համոզմունք հայտնեց, որ հայ-ռուսական համագործակցությունը բարձր մակարդակի վրա է: «Այդ դեպքը չի կարող մեր միջև սեպ խրել»,- ասաց նախարարը` բարձր գնահատելով հայ-ռուսական ռազմական համագործակցությունը, և որ այն ավելի գլոբալ անվտանգության հարց է լուծում` հաշվի առնելով Թուրքիայի առկայությունը:

Հարցին, թե արդյո՞ք Հայաստանը չի կարող մասնակցել Գյումրիում  ռուսական ռազմաբազա զորակոչվող  ռուս զինվորների ընտրության գործին, որովհետև ռուս զինվորների մասնակցությամբ արդեն քանի ողբերգական դեպք է եղել Գյումրիում, Սեյրան Օհանյանը նախ պատասխանեց, թե 102-րդ ռազմաբազայի գնդապետ Ռուձինսկին  վերջին տարիներին բավական լուրջ աշխատանքներ է  կատարել ռազմաբազայում մարտական պատրաստվածության բարձրացման ուղղությամբ, ապա նշեց, որ եթե համեմատելու լինեն ռուսական ռազմաբազան` տարիներ առաջ և հիմա, կա զգալի դրական տեղաշարժ:

«Կարծում եմ, որ մեր խնդիրը չէ: Յուրաքանրյուր սուվերեն պետուիթյուն իր տարածքում ինքնուրույն է իր անվտանգության խնդիրները լուծում, ինքնուրույն է որոշում իր ԶՈՒ կազմը, համագործակցությունը, պայմանները և համալրման խնդիրները: Չեմ կարծում, թե մենք պետք է մտնենք  դրա մեջ, որ արդեն զինվորների ստուգենք, դա ճիշտ չէ»,- ասաց Սեյրան Օհանյանը: