Ալյուրի հարստացման ծրագիր. մինչև 5 տոկոս սիրտանոթային հիվանդություններից մահացության դեպքերը կնվազեն

Ալյուրի հարստացման ծրագիր գործում է աշխարհի ավելի քան 82 երկրում, ավելին` խորհրդային տարիներին մեզ մոտ նույնպես փորձարկվել և իրագործվել է: Այս մասին իր տարեվերջյան ամփոփիչ ասուլիսի ժամանակ հայտարարեց ՀՀ առողջապահության նախարար Արմեն Մուրադյանը:

Նա նշեց, որ, 2000 թվականից սկսած, նախարարությունը Հայաստանում հետազոտություններ է իրականացրել եւ պարզել, որ հատկապես մինչեւ 5 տարեկան երեխաների ու հղի կանանց օրգանիզմում, հիմնականում երկաթի քանակության պակասով պայմանավորված, սակավարյունություն կա:

«Մինչև 5 տարեկան երեխաների շուրջ 37 տոկոսի և վերարտադրողական տարիքում գտնվող կանանց 27 տոկոսի մոտ մոտ սակավարյունություն կա: Մեզ մոտ 4 անգամ գերազանցում է նաև նյարդային խողովակի արատով ծնված երեխաների թիվը, ինչը նույնպես սակավարյունության հետևանք է: Վստահեցնում եմ, որ ծրագիրը միտում ունի հանրային շահերն ապահովելու, ծրագրի իրագործմամբ մինչև 5 տոկոս կնվազեն սիրտանոթային հիվանդություններից մահացության դեպքերը»,- ասաց նախարարը: