Արդարադատության նախարարը խոստացավ ստուգել եւ արձագանքել

Այսօր` կառավարության հետ հարցուպատասխանի ժամանակ, ԱԺ ՀՅԴ խմբակցության պատգամավոր Արծվիկ Մինասյանը հարց ուղղեց «Իրավաբանական անձանց պետական գրանցման, իրավաբանական անձանց առանձնացված ստորաբաժանումների, հիմնարկների և անհատ ձեռնարկատերերի պետական հաշվառման մասին» օրենքի կատարման ընթացքի վերաբերյալ:

Պատգամավորը նշեց, որ, ըստ օրենքի համապատասխան կետի, Պետական ռեգիստրի սպասարկման գրասենյակների այդպիսի գրանցում և հաշվառումը կարող են իրականացնել նաև նոտարները, փաստաբանները, փաստաբանական սենյակները և այլ անձինք: Եվ կառավարության որոշման համաձայն` նախատեսված է ընթացակարգ:

«Որոշ մտահոգություններ կան. թեև գրավոր դիմումներ կան, սակայն չեն մերժվել, բայց և չեն թույլատրել այդպիսի գրանցում իրականացնել: Հիշեցնեմ, որ այս դրույթի իրացումը ոչ միայն կհեշտացներ իրավաբանական անձանց գրանցումները, այլ, որ շատ կարևոր է, փաստաբանական գրասենյակներին հնարավորություն կտար այս ծառայությունները մատուցել: Ինչո՞վ է պայմանավորված օրենքի այս դրույթի չիրացումը»,- հարցրեց պատգամավորը:

Հարցին պատասխանեց ՀՀ արդարադատության նախարար Հովհաննես Մանուկյանը: Նա նշեց, որ ավելի ցանկալի կլիներ լսել կոնկրետ օրինակներ, քանի որ օրենքի խախտումներ նախարարությունը չի արձանագրել, ուստի խնդրեց, որ պատգամավորը օրինակներ ներկայացնի իրեն, եթե նման դեպքեր են գրանցվել:

Արծվիկ Մինասյանը, արձագանքելով, նշեց երեք դեպք` երեք փաստաբանական սենյակներ ոչ միայն դիմել են գրավոր, այլև նրանց դիմումներին որևէ արձագանք չի եղել օրենքով նախատեսված երկշաբաթյա ժամկետում:

«Ձեր ասածը կստուգեմ, միգուցե իրականությունը լրիվ այլ է: Կամ ինչո՞ւ են դիմել Ձեզ, այլ չեն վիճարկել այդ վարչական գործողությունը դատական կարգով: Կուսումնասիրեմ հարցը և կպատասխանեմ Ձեզ, վաղը ես Ձեզ տեղեկություն կհաղորդեմ»,- ասաց Հովհաննես Մանուկյանը: