Հովիկ Աբրահամյանն անմնացորդ նվիրվածություն խոստացավ

ԱԺ նիստում ներկայացվեց կառավարության ծրագիրը: Այն ներկայացրեց ՀՀ վարչապետ Հովիկ Աբրահամյանը:

«Պատիվ ունեմ ձեր հավանությանը ներկայացնելու կառավարության ծրագիրը: Այն ունի նոր ասելիք` դրանք իրագործելու մեխանիզմների ու գործիքների առումով: Եթե հակիճ բնութագրենք ծրագիրը, ապա այն իրատեսական է, բայց ոչ` հավակնոտ, խստապահանջ է, բայց ոչ` անտարբեր, ականջալուր, բայց` քաղաքական գծին հետամուտ»,- ասաց նա:

Վարչապետը հայտարարեց, որ ՀՀ քաղաքացիները փոփոխություններ են զգալու, որ կառավարությունը պատրաստ է աջակցել ցանկացած գործարարի ու քաղաքացու, բայց` բաց ու թափանցիկ ձևով: Հովիկ Աբրահամյանի խոսքով` ծրագրի կենտրոնում լինելու է քաղաքացին և նրա բարեկեցությունը: Նա հայտարարեց, որ պայքարելու է արտագաղթի և աղքատության չարքիներ դեմ, որ հայրենիքը դառնալու է ապահով հանգրվան յուրաքանյուր հայի համար:

«Յուրաքանչյուր հայ պետք է իմանա, որ Հայաստանում առկա են գործարար հնարավորություններ: Զոռբայության, իշխանության լծակների օգնությամբ ոչ ոք չի կարող յուրացնել ուրիշի ունեցվածքը կամ բիզնեսը: Ես պայքարելու եմ նման երևույթների դեմ: Տարվելու է անողոք, անաչառ և հետևողական պայքար ստվերի դեմ: Խստապահանջ եմ լինելու իմ մերձավորների նկատմամբ, պահանջելու եմ նույնը կառավարության անդամներից»,- ասավ վարչապետը:

Խոսելով կենսաթոշակային բարեփոխումների մասին` նա նշեց, որ դրանք անհրաժեշտ են երկրի զարգացման համար, սակայն լինելու է «պարտադիր, բայց ոչ պարտադրված» օրենք, և արվելու է ամեն ինչ, որպեսզի գտնեն բարեփոխումների` բոլորի համար ընդունելի տարբերակը: Հովիկ Աբրահամյանը խոստացավ անմնացորդ նվիրվածություն ծրագրի իրականացման գործում: