ԱՄՆ-ը մյուս տարի պաշտոնապես կընդունի Հայոց ցեղասպանությունը. թուրք հոդվածագիր

«2015 թվականին` 100-ամյա տարելիցին ընդառաջ, Հայոց ցեղասպանության հարցը շարունակելու է մնալ օրակարգում»,- գրել է թուրք հոդվածագիր Ռեջեփ Գյուվելիօղլուն Star պարբերականում հրապարակած հոդվածում:

Ըստ նրա` Թուրքիան կենթարվի աշխարհի` «ընդունի՛ր Հայոց ցեղասպանությունը» ճնշմանը:

«Շատ երկրներ արդեն ճանաչել են Հայոց ցեղասպանությունը, եւ դրա հերքումը քրեականացնող օրինագծեր  ընդունող երկրներ անգամ կան: ԱՄՆ-ը մյուս տարի պաշտոնապես կընդունի Հայոց ցեղասպանությունը: Այս անգամ նույնիսկ հրեական լոբբին հայկական սփյուռքի հետ աշխատանքներ կտանի: Սակայն քանի դեռ Թուրքիան շարունակում է հերքել Հայոց ցեղասպանությունը, անհնար է ստանալ հայկական սփյուռքի և Հայաստան պետության պահանջված արդյունքը: Եվ պարզ է նաև այն, որ Անկարան և՛ ֆինանսական‚ և՛ հոգևոր դժվարություններ կկրի, նույնիսկ կարող է տնտեսական պատժամիջոցի ենթարկվել»,- գրում է Գյուվելիօղլուն:

Այնուհետև հոդվածագիրն առաջարկում է Ցեղասպանությունը չճանաչելու դեպքում Թուրքիայի մասին, եթե ոչ մշտական, ապա ժամանակավոր լավ տպավորություն ստանալու երկու տարբերակ: Առաջինն այն է, որ Հայաստանից աշխատելու նպատակով Թուրքիա մեկնած հայերի համար հնարավորություններ ստեղծվեն: Իսկ երկրորդը վերաբերում է Անիին: «Անին հայերի համար հավատի կենտրոն է: Անին մեզ համար նույնպես կարևոր է: Տարիներ շարունակ ավերված Անին Հայաստանի սահմանին է»,- ասում է նա ու առաջարկում  այն կարճ ժամանակում վերակառուցել` միջազգային խորհրդատուների և օտարերկրյա ընկերությունների մասնակցությամբ:

Գյուվելիօղլուն հոդվածում նշում է նաև, որ Անիի վերակառուցումից հետո այն պետք է բաց լինի հայերի համար, և նրանցից անձնագիր չպետք է պահանջվի` այնտեղ գնալու և սեփական հոգևոր արժեքները տեսնելու համար: