Նախարարը հերքում է թուրք գործարարի՝ Երևանում շենք կառուցելու մասին լուրը

News.am-ը տեղեկացնում է, որ ՀՀ քաղաքաշինության նախարարության տվյալներով՝ հանրապետությունում թուրքական շինընկերություններ չեն աշխատում:

Այս մասին գործադիրի հոկտեմբերի 2-ի նիստում հայտարարել է քաղաքաշինության նախարար Նարեկ Սարգսյանը: Նա ինքն այդ մասին տեղեկացել է մամուլից եւ հանձնարարել ստուգել տեղեկատվությունը: Նախարարությունը դիմել է Երեւանի քաղաքապետարան՝ որպես մայրաքաղաքի տարածքում շինթույլտվություններ տրամադրող մարմնի: Թուրքիայից որեւէ ընկերության թույլտվություն այնտեղ չի տրամադրվել:

«Նույն պատասխանը ստացանք մարզպետարաններից: Հետեւաբար, մեր տվյալներով, Հայաստանում Թուրքիայից կառուցապատողներ այս պահին չկան: Եթե այդպիսիք լինեին էլ, ես դրանում վատ բան չեմ տեսնում: Ուղղակի փաստն եմ արձանագրում», - նշել է Սարգսյանը:

Հիշեցնենք, որ թուրքական Sabah կայքը հայտնել էր, որ թուրքական Ozturkler holding ընկերության նախագահ Յուսուֆ Օզթյուրքը հայտնել է Երևանում շենք կառուցելու մասին: