Գագիկ Խաչատրյանն ու Իշխան Զաքարյանը փնտրել են, բայց չեն գտել 1350 գլուխ «Էդիլբաև» տեսակի ոչխարները

Այսօր ԱԺ գյուղատնտեսական հարցերի հանձնաժողովում Վերահսկիչ պալատը ներկայացնում էր 2013թ. նույն ոլորտում արձանագրված խախտումները: Անդրադառնալով, մասնավորապես, «Ներդրումներ» ծրագրին` Իշխան Զաքարյանը խոսեց «Արալեռ ՏՈՏ» ընկերության կողմից կառավարությանը ներկայացված ծրագրով «Էդիլբաև» տեսակի ոչխարներ ներմուծելու խնդրին:

«Արալեռ ՏՈՏ» ընկերությունը հայտ էր ներկայացրել, որով նախատեսում է 2012թ. ներմուծել 900 գլուխ «Էդիլբաև» տեսակի ոչխարներ, որոնց գումարը կազմում է 90 մլն դրամ: Այդ ընկերության 2012-2013թթ. բիզնես ծրագրում գրված է, որ 1350 գլուխ ոչխար պետք է ներմուծեն` երկու տարվա կտրվածքով: Ծրագիրը նախատեսում է, ոչխարներ ներմուծելով, զարգացնել տոհմային ոչխարաբուծությունը:

ՎՊ նախագահը հարցում է ուղարկում ՊԵԿ նախագահին, թե 2012-2013թթ. ընթացքում «Էդիլբաև» տեսակի ոչխարներ, առհասարակ, ներմուծվե՞լ են Հայաստան: ՊԵԿ նախագահ Գագիկ Խաչատրյանը նամակ է ուղարկում ՎՊ նախագահ Իշխան Զաքարյանին, համաձայն որի` այդ երկու տարիների ընթացքում այդ տեսակի ոչխար չի ներմուծվել Հայաստան: Պարզվել է, որ «Արալեռ ՏՈՏ» ընկերությունը «Էդիլբաև» տեսակի 360 գլուխ  ոչխար է անցկացրել սահմանը, որոնք, սակայն, մինչ օրս մաքսազերծված չեն:

ՊԵԿ-ը հայցադիմումով դիմել է դատարան, որպեսզի մաքսազերծումը դարձնեն օրինական: Իսկ Վարչական դատարանը պարտադրել է, որ այդ ընկերությունը մաքսազերծի 366 ոչխար:

«Ինչո՞ւ մաքսազերծված չեն ոչխարները, և եթե նույնիսկ ընդունենք, որ 366 ոչխար է ներմուծվել, բայց դա 1350 չէ, չէ՞ որ ներմուծման համար է տրվել 90 մլն դրամը և 150 մլն դրամ փոխառությունը»,- ասաց Իշխան Զաքարյանը: