Հայ հրաձիգները 5 մեդալով կվերադառնան հայրենիք

Իսպանիայի Գրանադա քաղաքում սեպտեմբերի 6-20-ը ընթանում էր հրաձգության աշխարհի երիտասարդական  առաջնությունը:

Մասնակից հայ հրաձիգներից 7-ը, թեեւ մասնակցում են երիտասարդական տարիքային խմբում, սակայն պատանիներ են: Աշխարհի առաջնությունը հրաձգության առաջին մրցաշարն էր, որտեղ խաղարկվում էին 2016թ.-ի օլիմպիական ուղեգրեր:

Երեկ` սեպտեմբերի 19-ին, Հրաչիկ Բայաբայանը մասնակցել է 50մ, հրացան՝ 3 դիրքից (պառկած՝ 40 կրակոց, ծնկած՝ 40 կրակոց, կանգնած՝ 40 կրակոց) վարժությանը և որակավորման փուլում 52 մրցակցից՝ 1163 միավորով գրավել 7-րդ տեղը: Նույն միավորն են խոցել չինացի և ֆրանսիացի մարզիկները, սակայն Հրաչիկը նրանց շրջանցել է կենտրոնական տասերի առավելությամբ: 1163 միավոր խոցելն արդեն կարելի է հաղթանակ համարել, սակայն եզրափակիչում մեր հայրենակցին չի հաջողվել բարելավել դիրքերը և մրցումն ավարտել է` մնալով 7-րդ հորիզոնականում:  

Օլիմպիական չեմպիոն Հրաչյա Պետիկյանի հաջողություններից հետո հայ մարզիկներից ոչ ոք այս վարժությունում չէր կարողացել նման բարձր արդյունք ցույց տալ: Հրաչյա Պետիկյանը Բարսելոնայում, որտեղ դարձավ օլիմպիական չեմպիոն, որակավորման փուլում խոցել էր 1169 միավոր:

25մ, փոքր տրամաչափի ատրճանակ վարժությունում Զավեն Իգիթյանը խոցել է 557 միավոր և 32 մրցակցից գրավել 29-րդ տեղը:

Այսքանով ավարտվեց Աշխարհի առաջնությունը, այսօր տեղի կունենա փակման արարողությունը, և մեր մարզիկները վաղը՝ սեպտեմբերի 21-ին, ժամը 14:00-ին կժամանեն Երևան` աշխարհի առաջնությունից բերելով  5 մեդալ:

Հիշեցնենք, որ 10մ, օդամղիչ հրացան (60 կրակոց) երիտասարդ տղաների պայքարում Հրաչիկ Բաբայանը նվաճել է արծաթե մեդալ, 10մ, վազող թիրախ (20+20 կրակոց) երիտասարդ աղջիկների պայքարում Լիլիթ Մկրտչյանը նույնպես արժանացել է արծաթե մեդալի, նույն վարժության տղաների (30+30 կրակոց) պայքարում Ռազմիկ Մինասյանը նվաճել է բրոնզե մեդալ, 10մ, վազող թիրախ՝ խառը վազք (2x20 կրակոց) և 10մ, վազող թիրախ (20+20 կրակոց) վարժություններում տղաների թիմը՝ Ռազմիկ Մինասյան, Շանթ Սարգսյան և Հովհաննես Խաչատրյան, դարձել է կրկնակի բրոնզե մեդալակիր:

Աշխարհի առաջնությանը Հայաստանը ներկայացնում էին.

Մեր մարզիկները մասնակցում էին Հայաստանի հրաձգության հավաքական թիմի գլխավոր մարզիչ Սեյրան Նիկողոսյանի, մարզիչներ Խորեն Իգիթյանի և Գագիկ Մելոյանի մարզչական ղեկավարությամբ: