Քաջարանում աղիքային ինֆեկցիայի հետևանքով 7 մարդ է տեղափոխվել հիվանդանոց

Քաջարան քաղաքում օրերս աղիքային հիվանդություն է տարածվել: Yerkir.am-ի հետ զրույցում Կապանի բժշկական կենտրոնից Նարինե Քոչարյանը տեղեկացրեց, որ սեպտեմբերի 5-ից նույն գանգատներով իրենց մոտ է տեղափոխվել 7 մարդ:

«Միջին ծանրությամբ են ընդունվել հիվանդանոց, իսկ հիմնական գանգատները եղել են` ջերմություն, փորլուծություն, փորի շրջանում մկանային ցավեր: Նախնական տվյալներով` հետազոտության պատասխանները մաքուր է եղել, բայց հետազոտությունները դեռ շարունակվում են»,- ասաց Քոչարյանը` հավելելով, որ վաղն արդեն կլինեն հետազոտության վերջնական պատասխանները:

Այժմ հիվանդների վիճակը կայուն է, և հետազոտությունների վերջնական պատասխանները ստանալուց հետո արդեն կորոշվի նրանց դուրսգրման հարցը: Քոչարյանը տեղեկացրեց նաև, որ հիվանդների վիճակն այժմ կայուն է, ջերմություն չունեն: 

ՀՀ առողջապահության նախարարության հասարակայնության հետ կապերի բաժնից  Yerkir.am-ին հայտնեցին, որ ՀՀ ԱՆ «Հիվանդությունների վերահսկման և կանխարգելման ազգային կենտրոնի» մասնագետները սեպտեմբերի 8-ին և 9-ին կատարել են համայցեր. «Նախնական տվյալների համաձայն` ինֆեկցիան պայմանավորված չէ ջրի գործոնով: Համաճարակաբանական ուսումնասիրությունները շարունակվում են»:

Խնդրի կապակցությամբ մանրամասներ կտրամադրենք հետազոտության վերջնական արդյունքների ամփոփումից հետո: