Հայ-ռուսական համատեղ զորավարժություն` «Ալագյազ» զորավարժարանում

Այսօր` սեպտեմբերի 3-ին, Հայաստանի բարձլեռնային «Ալագյազ» զորավարժարանում մեկնարկել է ՀՀ ԶՈւ և ՌԴ ԶՈւ հարավային ռազմական օկրուգի 102-րդ ռազմաբազայի զինծառայողների համատեղ գումարտակային մարտավարական զորավարժությունը։ Այս մասին տեղեկացնում է ՌԴ ԶՈւ հարավային ռազմական օկրուգի մամուլի ծառայությունը:

Զորավարժությանը մասնակցում է ավելի քան 1500 զինծառայող, 300 միավոր ռազմական տեխնիկա։ Վարժանքները ղեկավարում է հայ-ռուսական միացյալ զորախմբի հրամանատար, գեներալ-լեյտենանտ Միքայել Գրիգորյանը: Հայտնի է, որ զորավարժությունն ընթանալու է մինչև սեպտեմբերի 7-ը:

Միջոցառման բացման արարողության ժամանակ հնչել են երկու երկրների օրհներգները, որից հետո ելույթ է ունեցել Միքայել Գրիգորյանը, ինչպես նաև 102-րդ ռազմաբազայի հրամանատար գնդապետ ԱՆդրեյ Ռուզինսկին:

Ռուսաստանյան կողմը զորավարժությանը ներկայացնում է ռազմաբազայի մոտոհրաձգային ուժեղացված գումարտակը և Երևանում տեղակայված ՄիԳ-29 կործանիչների էսկադրիլիան։ Գումարտակի կազմում ներգրավված են մոտ 1000 զինծառայող, ավելի քան 200 միավոր ռազմական տեխնիկա` ինչպես հետևակի մարտական մեքենաներ, տանկեր, հրետանային միջոցներ, այնպես էլ 40 միավոր հատուկ տեխնիկա:

Տեղեկացնենք նաև, որ զորավարժության ողջ ընթացքին հետևելու են «Նավոդչիկ-2» և «Զաստավա» անօդաչու թռչող սարքերը: