Ափսոս, որ երգիչ Աֆոնին ազատ չեն արձակել. փաստաբան

Բանդայի կազմում գործելու և նախկին ՊԵԿ ղեկավար Գագիկ Խաչատրյանի դեմ մահափորձ կատարելու համար 14 տարվա ազատազրկման դատապարտված Ռաֆայել Մասումյանը, նույն ինքը` երգիչ Աֆոն,ը ազատ չի արձակվել:

Yerkir.am-ի հետ զրույցում Մասումյանի փաստաբան Տիգրան Աթանեսյանն ասաց. «Ափսոս, որ ազատ չի արձակվել: Ընդամենը նրան պահելու ռեժիմն է կիսափակից փոխվել կիսաբացի»:

Իսկ թե ինչո՞ւ` ափսոս, փաստաբանը պատասխանեց. «Որովհետև նա անմեղ է, նա ոչինչ չի արել, մեղադրանքը խայտառակություն է»:

Մեր այն հակադարձմանը, թե այդպես է պատասխանում, որովհետև նրա փաստաբանն է, Տիգրան Աթանեսյանն արձագանքեց. «Ոչ, ես ցանկացած անձի կարող եմ ցույց տալ, որ նրա մեղավորությունը փաստող որևէ ապացույց գոյություն չունի»:

Փաստաբանն ասաց նաև, որ հայաստնյան պայմաններում այդ երկու ռեժիմներն իրարից չեն տարբերվում, օրենքով սահմանված են, սակայն հնարավորությունների բացակայության պատճառով դրանք չեն կիրառվում:

Նշենք, որ նախկին ՊԵԿ ղեկավար, ներկայումս ֆինանսների նախարար Գագիկ Խաչատրյանի դեմ մահափորձը կազմակերպվել է 2009 թվականին: Մասումյանի դեմ առաջադրված մեղադրանքի համաձայն` նա կազմավորված բանդայի անդամներին է փոխանցել 150 հազար դոլար` որպես սպանությունը կատարելու վճար: