ԲՀԿ-ն իր դիրքորոշումը չի փոխել...

Այսօր ՍԴ մամուլի ծառայությունը հաղորդագրություն է տարածել, որում հերքվում է մամուլում հրապարակված այն տեղեկությունը, թե օրերս հանդիպել են ՍԴ նախագահ Գագիկ Հարությունյանն ու ԲՀԿ առաջնորդ Գագիկ Ծառուկյանը` սահմանադրական բարեփոխումների  թեման քննարկելու նպատակով:

Նշենք, որ «Ժամանակ» թերթն էր հրապարակել տեղեկություն, որ  օրերս գաղտնի հանդիպել են ՍԴ նախագահ Գագիկ Հարությունյանն ու ԲՀԿ առաջնորդ Գագիկ Ծառուկյանը: Ընդ որում՝ հանդիպումն իբր եղել է Գագիկ Հարությունյանի նախաձեռնությամբ: Թերթի տեղեկություններով` Գագիկ Հարությունյան-Գագիկ Ծառուկյան հանդիպման ժամանակ Գագիկ Հարությունյանը փորձ է արել համոզել Ծառուկյանին՝ փոխել իր մոտեցումը ՍԴ փոփոխությունների նկատմամբ, սակայն Գագիկ Ծառուկյանը  անդրդվելի է եղել:

«Գագիկ Հարությունյանը երբեւիցե Գագիկ Ծառուկյանի հետ նման հարց չի քննարկել, մտերմական հարաբերություններով հանդերձ վերջին ամիսներին նրա հետ որեւէ առանձնազրույց չի ունեցել: Ու ընդհանրապես` սահմանադրական բարեփոխումների հարցում Գագիկ Հարությունյանը մասնագիտական քննարկումներից ու հանրային իրազեկումից բացի որեւէ մակարդակում գաղտնի կամ ոչ գաղտնի հանդիպումներ չի ունենում»,- ասված է հաղորդագրությունում:

Yerkir.am-ի հետ զրույցում ԲՀԿ խմբակցության քարտուղար Նաիրա Զոհրաբյանը նույնպես նշեց, որ նման հանդիպում ՍԴ նախագահի ու ԲՀԿ նախագահի միջև չի եղել, և որ սահմանադրական բարեփոխումների վերաբերյալ ԲՀԿ դիրքորոշման մեջ որևէ փոփոխություն տեղի չի ունեցել:

Հիշեցնենք, որ ԲՀԿ կուսակցությունը դեմ է սահմանադրական փոփոխությունների անցկացմանը` համարելով, որ երկրում կան առավել հրատապ խնդիրներ: