Ես մի բանը մի անգամ եմ ասում. Փաշինյանը մաքսատան աշխատակիցներին աշխատանքից ազատելու վերաբերյալ դիրքորոշումը չի փոխել

Հայաստանում տեղի ունեցած ժողովրդավարական փոփոխությունները ինստիտուցիոնալ առումով ամրապնդելու համար առանցքային նշանակություն ունի անկախ դատական համակարգի գոյությունը. այսօր Բարձրագույն դատական խորհուրդ կատարած իր այցելության ժամանակ նշեց ՀՀ վարչապետ Նիկոլ Փաշինյանը` հավելելով.  «Մենք ժողովրդավարության, օրինականության հարցում իսկապես կարևոր փոփոխություններ ենք արձանագրում, սակայն, որպեսզի այդ փոփոխություններն ինստիտուցիոնալ առումով երաշխավորվեն, հարկավոր է, որ դրանք ունենան ինստիտուցիոնալ երաշխիքներ, որոնցից կարևորագույնը անկախ դատական համակարգն է»:

Հավելենք, որ խորհուրդն այսօր ամփոփում է իր գործունեության մեկ տարին:

Վարչապետը միջոցառման վերջում նաև պատասխանեց լրագրողների հարցերին: Նա նշեց, որ ՊԵԿ-ից դեռ զեկուցում չի ստացել`արդյո՞ք աշխատանքից ազատվել են այն ծառայողները, որոնց ինքն ավելի վաղ հորդորել էր ազատել։

Հարցին՝ շարունակո՞ւմ է պնդել, որ աշխատակիցները պետք է հեռացվեն, վարչապետը պատասխանեց. «Ես մի բանը մի անգամ եմ ասում: Եթե որևէ մեկը գտնում է, որ ՀՀ վարչապետը չի կարող պաշտպանել ՀՀ դրոշը, ուրեմն իրենց պատկերացումները պետության մասին այլ են»։

Հիշեցնենք, որ Նիկոլ Փաշինյանն երեկ`ապրիլի 9-ին,  Նորագավիթի մաքսատուն կատարած շրջայցի ժամանակ նկատել էր Հայաստանի պետական խորհրդանիշ համարվող դրոշը փոշոտ վիճակում` սենյակի անկյունում գցած: Միջադեպից հետո նա հորդորել էր աշխատանքից ազատել պատասխանատուներին: «Մարդն ամեն օր գա, մտնի իր աշխատասենյակ, տենա դրոշը կեղտոտ գցած է անկյունում, այդ մարդը ո՞նց կարող է Հայաստանում ուսադիրներ կրել: Կազատեք բոլորին, մի մարդ չմնա էս սենյակում աշխատած։ Անուն-ազգանուններով կհետևեք և ինձ կասեք»,- ասել էր նա: