Մոտ ապագայում կամերային երաժշտական թատրոնը գեղարվեստական ղեկավար կամ գլխավոր ռեժիսորի չի ունենա

ՀՀ մշակույթի նախարար Արմեն Ամիրյանը Պետական կամերային երաժշտական թատրոնի կոլեկտիվին ներկայացրել է նոր տնօրենին:

«Հռիփսիմե Առաքելյանի հետ աշխատանքային երկար փորձ ունենք և՛ լրատվության, և՛ կառավարման ոլորտներում: Շատ լավ ծանոթ եմ նրա ունակություններին, կոլեկտիվը համախմբելու, գործընկերներին ոգեշնչելու և առաջնորդելու կարողությանը: Ուրախ եմ, որ մրցույթի արդյունքում հաղթող ճանաչվեց հենց Հռիփսիմեն, և վստահ եմ, որ կարճ ժամանակահատվածում Թատրոնը կվերագտնի իր երբեմնի դեմքը»,-ներկայացնելով նորանշանակ տնօրեն Հռիփսիմե Առաքելյանին՝ ասել է Ամիրյանը:

Մշակույթի նախարարությունից տեղեկանում ենք, որ նախարարը հույս է հայտնել, որ նոր տնօրենի հետ միասին կոլեկտիվը կձևավորի նոր դիմագիծ, նոր խաղացանկ ու Կամերային երաժշտական թատրոնի նոր տեսլականը: Նախարարն իր երախտագիտությունն է հայտնել տնօրենի արդեն նախկին պաշտոնակատար Եղիշե Խերանյանին, ով կարճ ժամանակահատվածով՝ ըստ պայմանավորվածության, ստանձնել էր Թատրոնը ղեկավարելու պատասխանատվությունն ու հասցրել սիրվել ու գնահատվել կոլետիվի կողմից:

Ինչպես Խերանյանի, այնպես էլ նրան նախորդած բոլոր ղեկավարների օրոք, Պետական կամերային երաժշտական թատրոնի դերասանները բարձրացրել են գեղարվեստական ղեկավար ունենալու անհրաժեշտության հարցը: Նախարարի ու նոր տնօրենի հետ հանդիպմանն այսօր խնդիրը կրկին օրակարգում հայտնվեց: «Մոտ ապագայում գեղարվեստական ղեկավարի կամ գլխավոր ռեժիսորի հարց օրակարգում չկա: Ժամանակ է անհրաժեշտ, որպեսզի նոր տնօրենը գնահատի Թատրոնում տիրող իրավիճակը, մթնոլորտը, նաև ձեզ հետ խորհրդակցելով, համատեղ ուրվագծելով այն պատկերը, որին ցանկանում է հասնել Կամերային երաժշտական թատրոնը: Տնօրենի հետ միասին նախ ինքներդ պետք է փորձեք հասկանալ՝ ի՞նչ քաղաքականություն եք մշակում Թատրոնում: Դրանից հետո միայն կորոշենք՝ պետք է ձեզ գեղարվեստական ղեկավար, թե ոչ: Չի՛ կարելի հրավիրել որևէ մեկին առանց այդ քաղաքականությունը հստակ պատկերացնելու»,-ասել է Ամիրյանը:

Նախարարը վստահեցրել է, որ առաջիկայում հանգուցալուծում կստանա նաև Կամերային թատրոնի «հեռակա կառավարման» երկարամյա ու տարօրինակ պրակտիկան.«Անընդունելի է, որ Թատրոնը գտնվում է քաղաքի մի ծայրում, իսկ տնօրենությունը՝ մյուս ծայրում: Այդպես չի՛ կարող շարունակվել: Տնօրենի հետ դուք գտնվելու եք ամենօրյա և ամենժամյա շփման մեջ, մշտապես զգալու եք նրա ներկայությունը հենց այստեղ՝ թատրոնում»:

«Ես ունեմ բոլորիդ աջակցության կարիքը, և պատրաստ եմ լսել ու համատեղ քննարկել բոլոր առաջարկությունները: Ի պաշտոնե, իհարկե, իրականացնելու եմ մենեջերի գործառույթներ, բայց հեռու չեմ թատրոնից ու արվեստից: Փորձենք միասին հասկանալ և ուրվագծել թատրոնի քաղաքականությունն ու առաքելությունը, որից հետո նաև լուծել մյուս խնդիրները»,- թատրոնի կոլեկտիվին առաջարկել է նոր տնօրենը: