«Փուչիկների դեպքից» տուժած աղջկա վիրահատության հարցը լուծվում է

Yerkir.am-ն իր հրապարակումներից մեկում գրել էր 21-ամյա Աննա Պետրոսյանի մասին, ով 2012-ի մայիսի 4-ին ՀՀԿ-ի հանրահավաքի ժամանակ փուչիկների պայթյունից հետո մինչ օրս ձեռնոցներով է շրջում և վիրահատման կարիք ունի: Խնդիրն այն է, որ աղջկա վիրահատման հարցն այդպես էլ չէր լուծվում` ոչ մեկին չէր հետաքրքրում աղջկա առողջական վիճակը:

ՀՀ առողջապահության նախարարությունն արձագանքել է yerkir.am-ի հրապարակմանը:  Աննա Պետրոսյանը նշեց, որ ՀՀ առողջապահության նախարար Արմեն Մուրադյանն արտահերթ ընդունելություն է կազմակերպել և հրավիրել իրեն նախարարություն:

«Նախարարն ասաց, որ բոլոր հարցերը շուտով կլուծվեն: Նա ինձ ուղեգիր տվեց, ըստ որի` պետք է այցելեմ ՀՀ առողջապահության նախարարության գլխավոր պլաստիկ վիրաբույժ Արտավազդ Սահակյանի մոտ: Նա կզննի ինձ և անհրաժեշտ բուժումը կառաջարկի: Նախարարն ասաց, որ Սահակյանը կնշի նաև ծախսերը, որն էլ ես պետք է նախարարություն ներկայացնեմ»,- ասաց Աննան: