Երեկ սահմանին իրավիճակը դարձյալ լարված է եղել

Երեկ երեկոյան ինտենսիվ կրակոցներ են եղել հայ-ադրբեջանական սահմանի հյուսիսարեւելյան հատվածում:

ՀՀ ՊՆ մամուլի խոսնակ Արծրուն Հովհաննիսյանը Yerkir.am-ին տեղեկացրեց, որ երեկ երեկոյան հակառակորդի կողմից ինտենսիվ  կրակոցներ են եղել ՀՀ Տավուշի մարզի հայկական դիրքերի ու սահմանամերձ բնակավայրերի ուղղությամբ:

Մեր աղբյուրներից տեղեկացանք, որ հայկական կողմի պատասխան կրակոցներից հետո հակառակորդը ստիպված է եղել դադարեցնել կրակը, եւ ադրբեջանական կողմից, ամենայն հավանականությամբ, զոհեր կան:

Արդեն այսօր ադրբեջանական լրատվամիջոցները լուրեր տարածեցին, որ ադրբեջանական կողմը կորուստներ ունի' զոհվել է 2 զինծառայող:

Հատկանշական է, որ գրեթե նույն ժամին, երբ ադրբեջանական կողմը կրակոցներ է արձակել Տավուշի մարզի դիրքերի ու բնակավայրերի ուղղությամբ, հակառակորդը դիվերսոն գործողություններ է սանձազերծել նաեւ Լեռնային Ղարաբաղի ՊԲ մարտական հենակետերի ուղղությամբ' ԼՂՀ Մարտունու շրջանի 3-րդ պաշտպանական շրջանում: Արցախում, ինչպես արդեն նշել ենք, հայկական կողմն ունի 1 զոհ:

Եվս մեկ զոհ հայկական կողմն ունի հայ-ադրբեջանական սահմանի հարավարեւմտյան հատվածում' Արարատի շրջանում: Սակայն նախնական վարկածով' Արարատի հատվածում հայ զինծառայողը, ամենայն հավանականությամբ, հակառակորդի գնդակից չի զոհվել, այլ իր կամ ծառայակիցների կողմից զենքի հետ անզգուշությամբ վարվելու հետեւանքով: Արարատի դեպքի կապակցությամբ  հետաքրքրվեցինք նաեւ Արծրուն Հովհաննիսյանից: Նա նշեց. «Դեպքի վայրում են գտնվում քննչական-օպերատիվ խումբը,  դատաբժիշկը և քրեագետ-մասնագետը: Կատարվում են անհետաձգելի քննչական գործողություններ: Առաջին իսկ հնարավորության դեպքում դրանց արդյունքները, օրենքով նախատեսված  թույլատրելիության սահմաններում, կհրապարակվեն»: