Արտահերթը տապալվում է. ՀՀԿ-ն չի կարողանում քվորում ապահովել

ՀԱԿ-ի պահանջած 20 րոպե ընդմիջումից հետո ՀՀ ԱԺ նախագահ Գալուստ Սահակյանը ժամանակ է ձգել, որ ՀՀԿ-ական պատգամավորները գան դահլիճ։

«Երբ ասացի` մեկ զգուշացումով ենք սկսելու ընդմիջումից հետո, բոլորիդ դեմքին ժպիտ էր, հիմա տեսնո՞ւմ եք, որ, իրոք, խնդիր կա»,- ասաց ԱԺ նախագահը:

Այնուհետեւ Գալուստ Սահակյանը սկսեց օրակարգում ընդգրկված հարցերը դնել քվեարկության։ Սկզբում այդ քվեարկությանը ոչ իշխանական ուժերը մասնակցեցին, սակայն, տեսնելով, որ քվորում ապահովելու համար ՀՀԿ-ն անհրաժեշտ 66 ձայնը չունի, երկրորդ քվեարկության ժամանակ ԲՀԿ-ն, ՀԱԿ-ը, ՀՅԴ-ն, «Ժառանգությունը» և ՕԵԿ-ը չմասնակցեցին քվեարկությանը։

Այսպիսով` մի շարք հարցեր ՀՀԿ-ն չկարողացավ անցկացնել՝ ունենալով ընդամենը 63-64 ձայն։ Տեսնելով, որ արտահերթը տապալվում է՝ ՀՀԿ խմբակցության ղեկավարը շտապ 20 րոպե ընդմիջում վերցրեց։ Քառյակն ու ՕԵԿ-ը դա ծափողջույններով ընդունեցին:

Նշենք, որ եթե «դեմ» կամ «ձեռնպահ» չի լինում, օրինագծերն ընդունելու համար անհրաժեշտ է առնվազն 66 «կողմ» ձայն: